‘मिसन नौटंकी’मार्फत जोगिन्दरको गाइजात्रे झटारो: व्यङ्ग्यको नशाले नेता लट्ठ

इटहरी/ नेता र सत्ता संरचनामाथि लगातार व्यङ्ग्य प्रहार गर्दै हास्यकलामा पृथक परिचय बनाएका कलाकार शिव शंकर रिजाल ‘जोगिन्दर पानवाला’ले यस वर्षको गाइजात्रा अवसरमा ‘मिसन नौटंकी’ लिएर आएका छन् । २२ औं गाइजात्रे कोसेलीको रूपमा सार्वजनिक गरिएको यस हास्य प्रस्तुतिमा रिजालले नेपाली राजनीति, भ्रष्टाचार, लुटपाट र नेताहरूको नौटंकी प्रवृत्तिलाई चिरफार गरेका छन् ।

गाइजात्रालाई व्यङ्ग्य र चेतनाको पर्व ठान्ने रिजालले यसपटक चर्चित फिल्म ‘जात्रै जात्रा’को हिट गीत ‘लाईदेउ माया पिरिम’मा आधारित प्यारोडीमार्फत रवि लामिछानेको जेल प्रकरणदेखि ‘मिस चौरासी’ जस्ता समसामयिक विषयहरूलाई जोडेका छन् । हेर्नुस् भिडियो ।

ओएसआर डिजिटलमार्फत सार्वजनिक ‘मिसन नौटंकी’ रिजालको लेखन, निर्देशन र प्रस्तुतीकरणमा तयार गरिएको हो । यसमा राधिका हमाल, प्रेम शर्मा पौडेल, सबित्रा लामिछाने ‘सबु’, धिरेन्द्र सिंह, किरण खनाल, बेदमणी अधिकारी, बलराम धमला ‘ठुले दाइ’, सबिना बिक, भिम परियार र बालकलाकार पोस्ना श्रेष्ठको अभिनय रहेको छ ।

@parikalanewsofficial

बि.सं. २०६१ देखि हरेक वर्ष गाइजात्रे कोसेली ल्याउँदै आएका रिजालले गत वर्ष ‘लुछाचुडी’ प्रस्तुत गरेका थिए । यस वर्षको ‘मिसन नौटंकी’लाई पनि दर्शकले माया गर्नेमा उनी आशावादी छन् । हाल उनी राष्ट्रिय नाचघरमा आयोजना हुने गाइजात्रे कार्यक्रममा सहभागी हुने तयारीमा छन् ।