गाउँको पीडा, सहरको उपेक्षा र जनताको व्यथा बोकेको ‘सिटामोल’को ट्रेलर रिलिज

इटहरी/ सामाजिक विडम्बना, सरकारी बेवास्ता र जनजीवनका तिक्त यथार्थलाई व्यङ्ग्य र हास्यरसमा पस्किएको नेपाली फिल्म ‘सिटामोल’को ट्रेलर सार्वजनिक भएको छ । जनैपूर्णिमाको अवसर पारेर साउन २३ गतेबाट देशभर प्रदर्शनमा आउन लागेको यो फिल्मको ट्रेलर बुधबार सार्वजनिक गरिएको हो, जसले दर्शकको उत्सुकता बढाएको छ ।

३ मिनेट २० सेकेन्ड लामो ट्रेलरले नेपाली समाजमा जरा गाडेर बसेका समस्याहरू-बेरोजगारी, गरिबी, भ्रष्ट व्यवस्था र पारिवारिक झमेलालाई गाउँले परिवेशमा हास्यात्मक शैलीमा देखाएको छ । ट्रेलरका संवादहरू सटिक छन्, दृश्यहरू सामाजिक सन्देशले भरिएका छन्, र पात्रहरू जीवन्त छन् । हेर्नुस् ट्रेलर ।

सौगात मल्ल र बेनिशा हमालको अभिनयले ट्रेलरलाई गहिराइ दिएको छ भने श्रीकृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल, बालकलाकार करण नेपाली र आराध्या राज्यलक्ष्मी डिसीको अभिनयले कथालाई व्यापकता दिएको छ । श्रीकृष्ण र जानुकाले यसै फिल्ममार्फत डेब्यु गरेका हुन् ।

राजबहादुर साने निर्देशित फिल्मको कथा प्रदीप भारद्धाज र सानेले लेखेका हुन् । सिमोस सुनुवारको प्रस्तुति रहेको ‘सिटामोल’ तुल्सी देवी फिल्म प्राली र जुनतारा फिल्मसको सहकार्यमा निर्माण भएको हो । निर्माता भुगोल कुमार कार्की र विकास राज जोशी रहेका छन् भने अप्सरा नेपाली, अजय मल्ल, कुमार केसी कार्यकारी निर्माता र गंगाराम श्रेष्ठ सह-निर्माताका रूपमा छन् ।

@parikalanewsofficial

फिल्मको संगीत बाबुल गिरीको छ । कविराज गहतराजको कोरियोग्राफी, बन्दे प्रसादको सम्पादन, राजेन्द्र मोक्तानको डिआई, मुकेश शाहको साउन्ड डिजाइन, देव र शंकर महर्जनको द्वन्द्व निर्देशन, राकेश दाहालको पोस्टर डिजाइन, विकास तामाङ र धनबहादुर राईको प्रोडक्सन व्यवस्थापन तथा दिव्य सुवेदीको छायांकनले ‘सिटामोल’लाई प्राविधिक रूपमा बलियो बनाएको देखिन्छ।