फिल्म ‘सुम्निमा’मा अनुप विक्रम शाही अनुबन्ध, अनुपको मिलन चाम्ससँग चौथो सहकार्य

ईटहरी/ नेपाली फिल्ममा ‘भिलेन’ अवतारमा बलियो छाप छोडेका अभिनेता अनुप विक्रम शाही अब एकदमै फरक भूमिकामा देखिने तयारीमा छन् । निर्देशक मिलन चाम्सको नयाँ प्रेमकथानात्मक फिल्म ‘सुम्निमा’मा उनी अनुबन्धित भएका छन्, जसले उनीहरुको सात वर्षपछि चौथो सहकार्यलाई पुनः जोड्नेछ ।

‘हँसिया’बाट सुरु भएको उनीहरूबीचको सहकार्य ‘वीर विक्रम’ र ‘लिलिबिली’सम्म पुगेको थियो । अब ‘सुम्निमा’मार्फत अनुपले आफूले अहिलेसम्म नगरेको चरित्र निभाउने तयारी गरिरहेका छन् । उनले यस भूमिकालाई विशेष चुनौतीका रूपमा लिएका छन् र अहिले त्यसका लागि तयारीमा समेत जुटिरहेका छन् ।

यसअघि अभिनेत्री उपासना सिंह ठकुरी र अभिनेता कुन्साङ बमजन यो फिल्ममा अनुबन्ध भइसकेका छन् । अन्य कलाकार चयन प्रक्रिया चलिरहेको छ । गोर्खा फिल्म्स र चाम्स इन्टरटेन्मेन्टको सहकार्यमा निर्माण हुने यो फिल्म विशुद्ध प्रेमकथामा आधारित हुनेछ ।

@parikalanewsofficial

राजीव थापाको लेखन रहेको फिल्मको छायांकन भदौदेखि लन्डन र नेपालमा हुने बताइएको छ । निर्देशक चाम्सका अनुसार फिल्म ‘सुम्निमा’ एक अन्तर्राष्ट्रिय दर्शकलाई लक्षित ‘यूनिभर्सल’ प्रेमकथा हुनेछ । यो उनको ११औं निर्देशकीय फिल्म हुनेछ । उनको पछिल्लो फिल्म ‘अञ्जिला’ (बायोपिक) सुपरहिट सावित भएको थियो ।