नेपाली फिल्म ‘नाकछोङ’को अन्तर्राष्ट्रिय प्रदर्शन यूकेबाट सुरु

इटहरी/ ‘लुङ्गा’, ‘संगम’, ‘त्रिवेणी’, ‘पापी मान्छे’, ‘वान वे’ जस्ता फिल्महरू र चर्चित टेलिभिजन शृंखला निर्माण गरिसकेका अनुभवी निर्माता ज्योतिराज राईको निर्माणमा बनेको फिल्म ‘नाकछोङ’ (बिजुवा) ले आफ्नो प्रदर्शन सुरु गरेको छ । नेपाल प्रदर्शन भन्दा पहिला अन्तर्राष्ट्रिय प्रदर्शन थालनी गरेको यो फिल्मको पहिलो प्रदर्शन यूकेमा भव्य तवरले गरिएको छ ।

आफ्नै मौलिक संस्कृति र परम्परालाई नयाँ पुस्तामा हस्तान्तरण गर्ने उद्देश्यका साथ निर्मित फिल्म ‘नाकछोङ’ (बिजुवा) ले यही जुलाई २० मा बेलायतको ‘द आसफोर्ड सिनेमा’ मा आयोजित कार्यक्रमका माझ विशेष प्रदर्शनी गरियो । प्रदर्शनमा स्थानीय नेता, व्यवसायी, भिआइपी र बेलायतमा बसोबास गर्ने नेपाली समुदायको उल्लेख्य उपस्थिति रहेको थियो । फिल्मको विशेष शोमा निर्माता ज्योतीराज राई स्वयं उपस्थित थिए ।

प्रदर्शनीपश्चात् दर्शकहरूले फिल्मको कथावस्तु र निर्माण पक्षको खुलेर प्रशंसा गरेका छन्, जसले नेपाली मौलिकतामा आधारित यस कृतिको महत्त्वलाई थप उजागर गरेको छ । कार्यक्रमको सम्पूर्ण व्यवस्थापन किरात राई यायोक्खा प्रा.का.स आसफोर्ड शाखाले सम्पन्न गरेको थियो । ‘नाकछोङ’ को अन्तर्राष्ट्रिय प्रदर्शन यूकेमा मात्र सीमित रहने छैन । बेलायतस्थित किरात राई यायोक्खाका सत्रै शाखाहरूमा यस फिल्मको प्रदर्शन गरिने तय भइसकेको छ ।

@parikalanewsofficial

निर्माता राईका अनुसार, यो फिल्म युरोपका पाँच प्रमुख स्थानसहित हङकङ, कोरिया, अष्ट्रेलिया, जापान, सिंगापुर, ब्रुनाई, मलेसिया लगायतका देशहरूमा पनि विशेष प्रदर्शनको मिति टुंगो लागिसकेको छ । यसले नेपाली कला र संस्कृतिको विश्वव्यापी प्रवर्द्धनमा महत्त्वपूर्ण भूमिका खेल्ने अपेक्षा गरिएको छ । ‘नाकछोङ’ ले किरात राई समुदायको परम्परागत ‘बिजुवा’ पात्रको महत्त्व र संरक्षणको विषयलाई उजागर गरेको छ ।

रीतिरिवाज, कुलपूजादेखि विवाहसम्मका परम्परामा नाकछोङ (बिजुवा) को भूमिकालाई फिल्मले जीवन्त रूपमा प्रस्तुत गरेको छ । निर्माता ज्योतीराज राईका अनुसार, यो फिल्म आफ्नै परम्परालाई जोगाएर नयाँ पुस्तामा हस्तान्तरण गर्ने पवित्र उद्देश्यले निर्माण गरिएको हो । फिल्ममा भुवन सिंह राई, यासेली योङ्हाङ, शुष्मा सुब्बा गुरुङ, सारा राई, तायाहाङ राई, अनुशा राई, सरोज राई, पूर्ण लिम्बु, त्रिचु राई, दिनेश कोइराला लगायतका अनुभवी कलाकारहरूको अभिनय रहेको छ ।

बालकलाकार जेशन राईको विशेष अभिनय पनि यस फिल्ममा देख्न सकिन्छ । किरण राईले यस फिल्मको निर्देशन गरेका छन् । यो उनको निर्देशनमा बनेको तेस्रो फिल्म हो । यसअघि उनले ‘लुङा’ र ‘जिउपंचौ’ जस्ता सफल फिल्महरू निर्देशन गरिसकेका छन् । फिल्मको लेखन पनि किरण राईले नै गरेका हुन् । पोपीराज राई सह-निर्माता रहेको यस फिल्मको छायांकन बाबु श्रेष्ठले गरेका छन् ।

‘नाकछोङ’को गीतमा राजन मुकारुङ र विष्णु किरातीको शब्द रहेको छ भने संगीत दिनेशकाजी वान्तवा र अनिल कोई राईले दिएका छन् । नोगेन लिम्बु र परेस राईले गीतमा स्वर दिएका छन् । सहायक निर्देशकको भूमिकामा बारत लिम्बु रहेका छन् भने कार्यकारी निर्माता रमु श्रेष्ठ र निर्माण नियन्त्रकमा गिरीराज राई र कमल लिम्बु (सार्के) छन् । निर्माता राईका अनुसार, ‘नाकछोङ’ लाई नेपालमा भने तत्काल प्रदर्शन गरिने छैन । विभिन्न अन्तर्राष्ट्रिय फिल्म महोत्सवहरूमा प्रदर्शन गरेपछि मात्र नेपालमा सार्वजनिक रूपमा प्रदर्शन गरिने योजना रहेको छ ।