‘होस्टेल अगेन’ पोष्टरमा ‘च्यातिएको पन्नामा गुलाबको फूलमाथि रगत पोतिएको चक्कु’

इटहरी/ डायरीको च्यातिएको पन्ना माथि रगतले लतपतिएको चक्कु र त्यसले च्यापेको गुलाबको फूल-‘होस्टेल अगेन’को पोस्टर हेर्दा नै यो ‘होस्टेल’ शृङ्खलाको अघिल्ला टीनएज ड्रामाभन्दा फरक, गहिरो र रहस्यमय यात्राको संकेत दिन्छ । ‘होस्टेल ३’ को सफलतापछि सोही निर्माण टिमले यो नयाँ श्रृंखला घोषणा गर्दै सामाजिक सञ्जालमार्फत पोस्टर सार्वजनिक गरेको छ ।

पोस्टरको हिंसात्मक र संवेदनशील प्रतीकले प्रेम, द्वन्द्व र रहस्यको त्रिकोणीय मिश्रण झल्काउँछ । ‘होस्टेल अगेन’ शीर्षकमा ‘अगेन’ शब्द जोडिनु र पोस्टरको लय हेर्दा यो अघिल्लो कथाको निरन्तरता हो कि होइन भन्ने प्रस्ट नभए पनि, यसले ‘होस्टेल’ ब्रान्डको नयाँ अध्यायको सुरुवात हुने संकेत गर्छ । पोस्टर ट्राइडेन्ट कन्सेप्टका रोयल भीमसेनले डिजाइन गरेका हुन् ।

यो नयाँ फिल्ममा ‘होस्टेल ३’ कै निर्देशक सशान कँडेल, लेखक माधव शर्मा, निर्माता सम्मान इन्टरटेन्मेन्ट र आरोन कन फिल्म्स तथा कार्यकारी निर्माता शङ्कर कोइराला यथावत् रहेका छन् । सशान कँडेलले पहिलोपटक निर्देशन गरेको ‘होस्टेल ३’ ले हलमा ५१ दिन प्रदर्शन गर्दै सफलता बटुलेको थियो । ‘होस्टेल ३’ मार्फत पारस बम, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली, सन्तोष बानियाँ, उमर खान जस्ता ताजा अनुहारहरूले दर्शकको मन जिते ।

@parikalanewsofficial

अब ‘होस्टेल अगेन’ मार्फत पनि नयाँ पुस्ताका कलाकारलाई अवसर दिने परम्परा कायम रहने अपेक्षा गरिएको छ । ‘होस्टेल’ सिरिजको पहिलो भाग २०७० मा हेमराज बिसीले र दोस्रो भाग ‘होस्टेल रिटर्न्स’ २०७२ मा सुरज भुसालले निर्देशन गरेका थिए । तेस्रो भाग ‘होस्टेल ३’ भने गत वर्षको फागुन २३ गते सार्वजनिक भएको थियो । ‘होस्टेल अगेन’ को छायाङ्कन चाँडै सुरु हुने बताइएको छ । यसअघि यिनै टिमले ‘बाउ भर्सेस छोरा’ घोषणा गरे पनि कलाकारहरूको व्यस्तताका कारण त्यो परियोजना अर्को वर्षका लागि सारिएको निर्देशक कँडेलले जनाएका छन् ।