फिल्म ‘रीमै’ अब भाद्र २० देखि प्रदर्शनमा आउने, सार्वजनीक भयो टिजर

इटहरी/ दयाहाङ राई, रिश्मा गुरुङ, अर्पण थापा र बुद्धि तामाङ अभिनीत नेपाली फिल्म ‘रिमै’ को रहस्य, प्रेम र बदला मिसिएको टिजर सार्वजनिक भएको छ । मंगलबार सार्वजनिक गरिएको करिब दुई मिनेट लामो टिजरमार्फत निर्माण टिमले फिल्मको प्रदर्शन मिति पनि एक हप्ता अगाडि सारेको घोषणा गरेको हो । अब ‘रिमै’ भदौ २० गतेदेखि देशव्यापी रूपमा प्रदर्शनमा आउनेछ । यसअघि भदौ २७ तोकिएको थियो ।

खिल बहादुर गुरुङको निर्देशनमा तयार भएको यो फिल्मको टिजरले ग्रामीण परिवेश, गुरुङ संस्कार, भावनात्मक कथा र सांस्कृतिक पक्षलाई विशेष स्थान दिएको देखिन्छ । टिजरमा दयाहाङको गम्भीर अभिनय, रिश्माको आत्मीय उपस्थिति, अर्पण थापाको रहस्यमय चरित्र र बुद्धि तामाङको प्रभावशाली प्रस्तुति झल्किन्छ । कथाले प्रेम, पीडा, संस्कार र बदला जस्ता भावनात्मक तहहरू छोएको संकेत दिइएको छ । हेर्नुस् टिजर ।

टिजरको अन्त्यमा देखिएको तनावपूर्ण दृश्यले कथामा सशक्त द्वन्द्व रहने संकेत गर्दछ । संवाद र दृश्य संयोजनले समाजका गहिरा यथार्थ देखाउने आशा निर्माण टिमले व्यक्त गरेको छ । गोरखा सिरानचोक एण्ड लिगलिगकोट फिल्म्स प्रालिको प्रस्तुति र रोटेपिङ इन्टरटेनमेन्टको सहकार्यमा बनेको फिल्ममा गौमाया गुरुङ, कविता आले मगर, माओत्से गुरुङ, पुस्कर गुरुङ, वीरमाया गुरुङ, वीरवल घले, डिवी गुरुङ, टेक गुरुङ, र बालकलाकार असिम सुब्बा, प्रेस्टु गुरुङ र प्रश्ना राना मगरले पनि अभिनय गरेका छन् ।

@parikalanewsofficial

उपेन्द्र सुब्बाको लेखन, शैलेन्द्र ध्वज कार्कीको छायांकन, मित्र डि गुरुङको सम्पादन, दीपक शर्मा र थानेश्वर गौतमको संगीत तथा किरण चाम्लिङ राईको मुख्य सहायक निर्देशन रहेको यो फिल्मका कार्यकारी निर्माता वीरवल घले हुन् । टिका गुरुङ, जित यात्री गुरुङ र दुन बहादुर घले निर्माता तथा बिनु गुरुङ, रोशन भट्टराई र राजेश घिमिरे सह-निर्माताको रूपमा रहेका छन् । सामाजिक, सांस्कृतिक र भावनात्मक तहमा गहिरिएर प्रस्तुत भएको ‘रिमै’ ले दर्शकबीच उत्साह र चासो थप्ने अपेक्षा गरिएको छ ।