इटहरी/ नेपाली फिल्म ‘आँ बाट आमा’ मा अभिनेत्री सिमरन पन्तलाई अभिनेता पल शाहको अपोजिट कास्ट गरिएको छ । सोमबार अनुबन्धन प्रक्रिया पूरा गर्दै निर्माण टिमले सिमरनलाई फिल्मको प्रमुख भूमिकामा भित्र्याएको हो । यसअघि ‘होस्टेल ३’ मार्फत अभिनय यात्रा सुरू गरेकी सिमरनको यो दोस्रो फिल्म हो । ‘आ बाट आमा’ को निर्देशन चन्द्र पन्तले गरिरहेका छन्, जसले यसअघि ‘माई’ र ‘ह्रस्वदीर्घ’ निर्देशन गरिसकेका छन् ।
निर्देशक पन्तकै ‘ह्रस्वदीर्घ’ मार्फत अभिनेत्री विपना थापाले १६ वर्षपछि नेपाली फिल्ममा पुनरागमन गरेकी थिइन्, र अब उनी पुनः पन्तकै फिल्ममा काम गर्न लागेकी हुन् । फिल्ममा भारतीय अभिनेता प्रदीप रावतको पनि महत्वपूर्ण भूमिका रहनेछ । उनी यसअघि ‘ह्रस्वदीर्घ’ मा अभिनेत्री नीता ढुंगानाका बुबाको भूमिकामा देखिएका थिए भने ‘आ बाट आमा’ मा उनले पल शाहका बुबाको भूमिका निभाउनेछन् ।
रावत तेलुगु, हिन्दी र तमिल फिल्ममा आफ्नो अभिनयको छवि बनाइसकेका अनुभवी कलाकार हुन् । आर्या इन्टरटेन्टमेन्टको ब्यानरमा बन्न लागेको यो फिल्म भदौदेखि छायांकनमा जाने तयारीमा छ । निर्माण पक्षले प्रमुख कलाकारहरूसँगै अन्य प्राविधिक टिमको टुंगो पनि चाँडै लगाउने बताएको छ । फिल्मको थिम पोस्टर एक महिना अगाडि नै सार्वजनिक भइसकेको छ । निर्देशक चन्द्र पन्तका अनुसार ‘आँ बाट आमा’ आगामी फागुन १५ गतेबाट देशभर प्रदर्शनमा आउने तय भइसकेको छ ।
@parikalanewsofficial
Discussion about this post