‘म त सुतेर उठेको पैसामा’ बोलको गीतसहित ‘माग्ने राजा’को प्रचार तिव्र

इटहरी/ चर्चित हास्य अभिनेता केदार घिमिरे ‘माग्ने बुढा’ र विल्सन विक्रम राई ‘तक्मे बुढा’को रोचक केमेस्ट्री लिएर आउँदै गरेको फिल्म ‘माग्ने राजा’ले दोस्रो गीत सार्वजनिक गर्दै प्रचार अभियानलाई तिव्र बनाएको छ । ‘म त सुतेर उठेको पैसामा’ शीर्षकको यो गीत सोमबार काठमाडौंमा आयोजित एक कार्यक्रमका बीच सार्वजनिक गरिएको हो । गीतमा केदार र विल्सनसँगै बालकलाकार रोनिश खड्का फिचर्ड छन् ।

गायन, संगीत, शब्द तथा एरेञ्ज एकै साथ सम्हालेका बाबुल गिरीलाई चाइल्ड भर्सनमा रोनिशले स्वरमा साथ दिएका छन् । गम्भीर बिष्टको कोरियोग्राफीमा तयार भएको यो गीतको अडियो–भिजुअल पक्ष प्रभावशाली देखिन्छ । शब्द, लय र दृश्य संयोजनले यो गीतलाई टिकटक र फेसबुक रिल्समा भाइरल गराउने सम्भावना बलियो देखिएको छ । झण्डै ८ वर्षको अन्तरालपछि निर्देशनमा फर्किएका ऋषि लामिछानेको निर्देशनमा बनेको ‘माग्ने राजा’ भाद्र ६ गतेदेखि देशभर प्रदर्शनमा आउँदैछ । हेर्नुस् भिडियो।

यो फिल्म मुनाल घिमिरेको निर्माण तथा प्रस्तुति हो, जो हाल दाङको घोराही उपमहानगरपालिका–४ का वडा अध्यक्ष समेत हुन् । ‘इच्छा’पछि लामो समयपछि उनी पुनः फिल्म निर्माणमा फर्किएका हुन् । आरम्भ प्रोडक्सनको ब्यानरमा निर्माण भएको फिल्ममा केदार, विल्सन र रोनिशसँगै वर्षा सिवाकोटी, पुष्कर गुरुङ, शिशिर वाङ्देल, शारदा गिरी र पवित्रा साकी (मिस पबी) को अभिनय रहेको छ ।

फिल्ममा आर्यन सिग्देलको विशेष भूमिका छ भने छायाँकन नरेन्द्र मैनालीले गरेका हुन् । सामीप्य राज तिमल्सिनाको कथा, पटकथा तथा संवाद र दीपक शर्मा र बाबुल गिरीको संगीत रहेको यो फिल्म आरआर फिल्म्सले वितरण गर्दैछ । आकर्षक गीत, चर्चित कलाकार र हास्यप्रधान कथावस्तुका कारण ‘माग्ने राजा’ले दर्शकको ध्यान तान्ने बलियो संकेत देखिएको छ ।