इटहरी/ नेपाली फिल्म उद्योगमा यसपालिको वडा दशैं विशेष बन्ने देखिएको छ । त्यो पनि बहुप्रतीक्षित फिल्म ‘बलिदान’ले ल्याएको दृश्यात्मक क्रान्तिका कारण । दशैंको फूलपातीको उत्सवसँगै फिल्मको ६० फिट अग्लो र १६ फिट चौडा विशाल पोस्टर सार्वजनिक गर्दै फिल्म निर्माण युनिटले प्रचारप्रसारको नयाँ अभ्यास सुरु गरेको छ । बिहीबार काठमाडौंको गोङ्गबुस्थित ल्होत्से मलको बाहिरी भागमा राखिएको उक्त पोस्टरले नयाँ शैलीको सुरूवात गरेकाे छ ।
सार्वजनीक पोस्टरमा अभिनेता समीर भट्ट रगतले लतपतिएका, घाइते र क्रुद्ध मुद्रामा एक दैत्याकार आकृतिमाथि भालाजस्तो अस्त्र चलाउँदै देखिन्छन् । आकाशमा कालो बादल, पृष्ठभूमिमा आगोको राप, अनि जमिनको अन्धकारले यो दृश्यलाई गहिरो सिनेम्याटिक अनुभूति दिएको छ । निर्देशक सन्तोष सेनले पोस्टरसँगै फिल्मलाई ‘सिनेम्याटिक क्रान्तिको सुरुवात’को संज्ञा दिएका छन् ।

“बलिदान अब केवल एउटा फिल्म होइन, यो हाम्रो भावना, हाम्रा संघर्ष र देशप्रेमको कथा हो,” उनले भने । सेनका अनुसार फिल्मले दृश्य संरचना, कथा र पात्र विकासमा अत्यधिक मिहिनेत गरिएको छ, जसले यो परियोजनालाई एक विशेष सिनेम्याटिक अभियान बनाएको छ – ‘यो ज्यान बलिदान’।
@parikalanewsofficial
विदेशी फिल्मको भिडमा पनि मौलिकता र आत्मबलमार्फत छुट्टै पहिचान बनाउने लक्ष्यसहित निर्माण भएको ‘बलिदान’ले गाउँदेखि सहरसम्म, टोलदेखि बस्तीसम्मका दर्शकलाई समेट्ने उद्देश्य लिएको निर्देशकको भनाइ छ । यही सन्दर्भमा ‘बलिदान ब्यानर’मार्फत देशव्यापी प्रचार–प्रसार अभियान सुरु गरिएको छ । यसअघि अभिनेता सौगात मल्लको रहस्यमय लुकसहितको पोस्टर, समीर भट्टको जन्मदिनमा सार्वजनिक गरिएको प्रि-टिजर, र समीर भट्ट तथा कविता रायका पात्र पोस्टरहरूले समेत राम्रो चर्चा बटुलेका थिए ।
‘आसुसेन फिल्म्स् प्रा.लि.’को ब्यानरमा निर्माण भएको ‘बलिदान’मा समीर भट्ट, सौगात मल्ल, कविता राय, अर्पण थापा, ऋचा शर्मा, हेमन्त बुढाथोकी र प्रेम पुरी लगायतको दमदार अभिनय समेटिएको छ । फिल्मका निर्माता पवन ब्राडफोर्ड बिस्ट र कार्यकारी निर्माता प्रेम पुरी रहेका छन् । ‘बलिदान’को यो भव्य तयारीले यसलाई केवल दशैंको एउटा फिल्म नभई, नेपाली फिल्ममा एक ऐतिहासिक मोडको रुपमा स्थापित गर्ने संकेत देखिएको छ ।















Discussion about this post