अमेरिकाका २० बढी सहरहरूमा गुञ्जने तयारीमा अस्मिता र महेशको जोडी

इटहरी/ चर्चित गायिका अस्मिता अधिकारी र गायक महेश काफलेको संयुक्त साङ्गीतिक यात्रा ‘सोलफुल यु.एस.ए यात्रा’ आगामी अगस्टदेखि सुरु हुने पक्का भएको छ । उक्त यात्रा सन् २०२५ को अगस्टदेखि अक्टोबरसम्म अमेरिकाका २० भन्दा बढी सहरहरूमा गरिनेछ । मंगलवार आयोजित पत्रकार भेटघाटमा ‘ओनेस्ट रियल इस्टेट’ द्वारा प्रस्तुत र ‘थ्री ई इन्टरटेन्मेन्ट’ को व्यवस्थापनमा हुने सो टुरबारे जानकारी दिइयो ।

कोलम्बस (ओहायो), मियामी (फ्लोरिडा), ब्रानफोर्ड (कनेक्टिकट), एशबर्न (भर्जिनिया), ल्यान्कास्टर (पेन्सिलभेनिया) लगायतका सहरहरूमा प्रस्तुति हुने तय छ । थ्री ई इन्टरटेन्मेन्टका नेपाल प्रतिनिधि अन्जान बुढाथोकीका अनुसार, महेश र अस्मिताको अमेरिकामा प्रशस्त डिमान्ड भएकाले यो यात्रा आयोजना गरिएको हो ।

यस अवसरमा गायक महेश काफ्ले र गायिका अस्मिता अधिकारीले आफूहरू निकै उत्साहित रहेको जनाउँदै, अमेरिकामा रहेका नेपाली समुदाय नजिक पुग्ने र प्रत्यक्ष गीत सुनाउने अवसरलाई सौभाग्य मानेका छन् । ‘लजावती झार’, ‘नाच फिरिरि’ र ‘लाइटरले बिडी सल्केको’जस्ता लोकप्रिय गीतका लागि परिचित यी दुई कलाकारको जोडी अमेरिकामा सांगीतिक रौनक बढाउने विश्वास गरिएको छ ।

@parikalanewsofficial

यसअघि पनि थ्री ई इन्टरटेन्मेन्टले आनी छोइङ डोल्मा, अभया एण्ड द स्टिम इन्जिन्स, कालीप्रसाद बाँस्कोटा, इन्दिरा जोशी, प्रमोद खरेल, अञ्जु पन्तजस्ता कलाकारहरूको सफल अमेरिकी टुर गराइसकेको छ । १९७४ एडीको लाइभ कन्सर्टदेखि लिएर “डिटिफेस्ट” तथा “ग्लोबल नेपाल फेस्ट” जस्ता भव्य कार्यक्रमहरूमार्फत अमेरिकामा नेपाली कला, संस्कृति र पर्यटनको प्रचारप्रसार गर्दै आएको यो संस्थाले यसपटक अस्मिता र महेशको यात्रा पनि विशेष बनाउने दाबी गरेको छ ।