५१ दिनमा फिल्म ‘कोशेढुंगा’को छायांकन सम्पन्न, ४० देशमा एकसाथ प्रदर्शन हुने

इटहरी/ आगामी भदौ १२ गतेदेखि नेपाल सहित ४० देशमा एकसाथ प्रदर्शनको तयारीमा रहेको फिल्म ‘कोशेढुंगा’को छायांकन सम्पन्न भएको छ । नेपाली फिल्म क्षेत्रले अन्तर्राष्ट्रिय फड्को मार्दै गरेको बेला सर्वकालीन सफल फिल्म पूर्ण बहादुरको सारङ्गी का निर्देशक पौडेलले निर्देशन गरेको यो बहुप्रतीक्षित फिल्मको छायांकन हालै ५१ दिनमा सम्पन्न भएको हो । फिल्मको अन्तिम छायांकन मकवानपुरको चितलाङ्ग, मार्खु क्षेत्रका मनोरम स्थलहरूमा गरिएको थियो भने सुरुवात ललितपुरको च्यासलस्थित सेटबाट गरिएको थियो ।

मुख्यतया गण्डकी प्रदेशका स्याङ्जा, आधिखोला, त्रिवेणी र सिरुवारी जस्ता स्थानहरूमा छायांकन गरिएको यस फिल्मले ग्रामीण सौन्दर्य र मौलिक कथालाई पर्दामा उतार्ने प्रयास गरेको छ । सेभेन सिज इन्टरनेसनल मार्फत प्याट्रिक सुवेदी र रमेश ढकालले यो फिल्मलाई अन्तर्राष्ट्रिय बजारमा वितरण गर्दै छन् । यो नेपालका लागि मात्र होइन, सम्पूर्ण नेपाली फिल्मका लागि ऐतिहासिक अवसर हो ।

@parikalanewsofficial

निर्देशक सरोज पौडेलको अघिल्लो सफलताले गर्दा कोशेढुंगा प्रति दर्शकको अपेक्षा निकै उच्च छ । पूर्ण बहादुरको सारङ्गी ले करिब ४७ करोड ५० लाखको ग्रस सङ्कलन गरेको थियो, जसले सरोजलाई नेपाली फिल्म क्षेत्रको एक स्थापित नाम बनाएको हो । यो फिल्ममा सुरक्षा पन्त, आर्यन सिग्देल, ऋचा शर्मा, नीति शाह, सरोज खनाल, विशाल पहाडी, मन्जिल कुमार, प्रवीण खतिवडा, हिउवाला गौतम लगायतका चर्चित कलाकारहरूको अभिनय रहनेछ ।

नरदेवी फिल्म्सको प्रस्तुति रहेको यो फिल्ममा प्रेविल कँडेल र किशोर अनुराग निर्माताका रूपमा रहेका छन् भने कार्यकारी निर्माता दिनेश खड्का हुन् । बाबु श्रेष्ठको छायांकन, नहकुल खड्काको सम्पादन र आशिष अविरल तथा रिदम कँडेलको संगीतले फिल्मलाई अझ सशक्त बनाउने विश्वास लिइएको छ । छायांकनकै क्रममा सार्वजनिक गरिएको पोस्टरमा मुख्य अभिनेत्री सुरक्षा पन्तलाई फिचर्ड गरिएको छ, जसले फिल्मप्रतिको कौतुहलता थप बढाएको छ ।