फिल्म ‘विन्डो सिट’को कोशी प्रदेशको प्रमुख शहरमा विशेष शो गरिने

इटहरी/ नारीको संवेदनशील दृष्टिकोणमार्फत राजनीतिक आन्दोलनको चिर्कटो खोल्ने नेपाली फिल्म ‘विन्डो सिट’ अब नेपालमा विशेष शोमार्फत सार्वजनिक हुने तयारीमा छ । भारतमा निर्माण भएको यो फिल्म सन् १९८६ मा भारतको पश्चिम बंगाल, विशेषतः दार्जिलिङमा भएको हिंसात्मक गोर्खाल्याण्ड आन्दोलनको पृष्ठभूमिमा आधारित छ । तर, यो केवल एउटा राजनीतिक कथा भने नभएको निर्माण युनिटले जनाएको छ । यो महिलाको जीवन, संघर्ष र चेतनासँग गासिएको जीवन्त प्रस्तुति हो ।

केही अघि सिक्किममा आयोजित विशेष शोमा उल्लेखनीय प्रतिक्रियाहरू पाएपछि निर्माण टिम नेपालका कोशी प्रदेशका प्रमुख शहरहरूबाट विशेष प्रदर्शन गर्दै नेपालभर प्रदर्शनको यात्रामा जुटेको छ । फिल्मका लेखक, निर्देशक तथा सम्पादक वंगेल शेर्पाका अनुसार, “विन्डो सिट, चार फरक महिला पात्रहरूको कथा हो, जसले आशा, निराशा, प्रेम र अराजकताको आरोह-अवरोह पार गर्दै समाजका विविध तहमा रहेका संघर्षहरूको प्रतिविम्ब प्रस्तुत गर्छ ।”

फिल्मले एउटा सामान्य परिवारको कथा प्रस्तुत गर्छ, जो राजनीतिक अशान्तिको बिचमा परेको छ । कथाले देखाउँछ कि, कसरी राजनीतिक आन्दोलनको क्रसफायरले जीवनलाई विदारक मोडमा पुर्‍याउँछ । वैचारिक चरमपन्थ, विश्वासघात, पारिवारिक बन्धन र अस्तित्वको लडाइँ फिल्मका मूल विषयवस्तु हुन् । निर्देशक शेर्पाको विश्वास छ कि फिल्मले दर्शकलाई गहिरो भावनात्मक प्रभाव पार्नेछ, किनभने यसले अँध्यारो परिस्थितिमा पनि मानिसभित्रको उज्यालो खोज्ने क्षमतालाई उजागर गर्छ ।

@parikalanewsofficial

‘रोल सिनेमा एक्शन’को ब्यानरमा बनेको फिल्मको निर्माणमा माया शेर्पा, प्रमोद शेर्पा, शुभम चांडक, प्रशुन प्रधान, शुवेक्षा क्षेत्री, प्रणय प्रधान, अमृत सिंह, शुशोभन सरकार, पासाङ टासी भुटिया, अपराजिता सेनगुप्ता, विनय सिन्चुरी र रितिका पुन मगर रहेका छन् । कार्यकारी निर्माता वंगेल शेर्पा र प्रयाग प्रधान हुन् । फिल्मको छायांकन प्रयाग प्रधानले गरेका हुन् भने हिमाल शर्मा क्यामेरापर्सनको भूमिकामा छन् । संगीतमा उदय सोताङ, श्रुती विश्वकर्मा र आशिष खातीको स्वर रहेको छ । गीतहरूको कोरियोग्राफी पन्नु गजमेरको रहेको छ ।

कस्ट्युम र हेयर डिजाइन वेदा क्षेत्री र निकिता चाम्लिङले सम्हालेका छन् । फिल्ममा मेनुका प्रधान, सुरक्षा पन्त, सोनाम डिकी शेर्पा, प्रविण सेन्चुरी, मालती क्षेत्री, हेलेन लेप्चा, जेसिका मुखिया, शुष्मा प्रधान, अभिगल विश्वकर्मा, रुथ राई, लेक्जिमा भुटिया, सफल गुरुङ, राहुल मुखिया, विश्वराज परियार, फुप्देन शेर्पा, सोनाम तामाङ, विश्वास गुरुङ र कृषि क्षेत्रीको अभिनय रहेको छ । नेपालमा आयोजना हुने विशेष शोहरूमा जे.बी. टुहुरे फाउण्डेशन स्थानिय संयोजकको रूपमा समावेश हुनेछ ।