भारतीय बाबुछोराले खिच्ने पक्का निता ढुंगानाको ‘सुख–दुःख’

इटहरी/ अभिनयमार्फत नेपाली दर्शकको मन जितिसकेकी नीता ढुंगाना अब फिल्म निर्देशकको रूपमा नयाँ यात्रा सुरु गर्दैछिन् । उनको डेब्यु निर्देशन रहने फिल्म ‘सुख–दुःख’ आगामी २०८३ सालको दशैंमा प्रदर्शनको तयारीमा छ । यो फिल्मका लागि प्राविधिक पक्षमा बलियो टोली जोडिएको छ । भारतीय चर्चित छायाँकार कबीरलाल र उनका छोरा शाहीद लालले फिल्म खिच्ने भएका छन् । ढुंगानाले आइतबार औपचारिक सम्झौता गर्दै फिल्मको छायांकन टिम घोषणा गरेकी हुन् ।

कबीरलाल यसअघि ‘परदेश’, ‘ताल’, ‘कहो ना प्यार है’, ‘हम आपके दिल में रहते हैं’, ‘हिरोपन्ती २’ जस्ता बलिउड फिल्ममा छायाँकन गरिसकेका अनुभवी व्यक्तित्व हुन् । उनले नीताकै ‘ह्रस्व दीर्घ’ फिल्म पनि खिचेका थिए । उनका छोरा शाहीद लालले पनि कन्नड र तेलुगु भाषाका आधा दर्जनभन्दा बढी फिल्ममा छायांकन गरिसकेका छन् । फिल्मको वितरणको जिम्मेवारी पनि तय भइसकेको छ ।

काठमाडौं उपत्यकाभित्र ‘रिच इन्टरटेनमेन्ट’ र उपत्यकाबाहिर ‘एफडी कम्पनी’ले फिल्म वितरण गर्नेछन् । दुवै संस्थासँग नीताले कागजी सम्झौता गरिसकेकी छन् । निर्माण व्यवस्थापन शंकर पाण्डेले सम्हाल्ने छन् । ‘नीता फिल्म्स’को ब्यानरमा बन्ने फिल्मको कलाकार घोषणा हुन बाँकी भए पनि नीता ढुंगाना ‘सुख–दुःख’ले नेपाली संस्कृतिमा आधारित गहिरो भावनात्मक कथा दिने विश्वासमा छिन् ।