'यो मन त मेरो नेपाली हो'को करिब २०० राष्ट्रिय झण्डा समावेस गीतको भिडियो सार्वजनिक

इटहरी/ देशको माटो र आत्माभाव बोकेको फिल्म ‘यो मन त मेरो नेपाली हो’ यही असार २७ गतेबाट देशभर प्रदर्शनमा आउँदैछ । प्रदर्शन मिति नजिकिँदै गर्दा फिल्मको शीर्ष गीत सार्वजनिक गरिएको छ, जसले दर्शकमाझ राष्ट्रियता र देशभक्तिको भावना अझै प्रगाढ बनाउने उद्देश्य लिएको छ ।देशप्रेमको भावना बोकेको शीर्ष गीतमा फिल्मका मुख्य कलाकार विजय बराल, रोशन श्रेष्ठ, विल्सन विक्रम राई, आयुशा समाल, बुद्धि तामाङ र मित्र प्रधानको अभिनय देख्न सकिन्छ ।

जरसिंह पौवास्थित साँगा चोकमा छायांकन गरिएको गीतमा करिब २०० वटा राष्ट्रिय झण्डाको भव्य प्रयोग गरिएको छ । गीतमा विकास चौधरीको संगीत, शंकर अधिकारी घायलको शब्द र कमल रसाइलीको सशक्त स्वर रहेको छ । नृत्य निर्देशन कविराज गहतराजले गरेका छन् । हेर्नुस् भिडियो।

इश्वर इन्टरटेन्मेन्ट प्रालिको ब्यानरमा तयार भएको फिल्म मित्र प्रधानको प्रस्तुति हो भने निर्माण ज्ञानबहादुर प्रधान (रोशन) ले गरेका हुन् । फिल्ममा नारायण खाती, भूपेन्द्र लिङ्देन ‘मन्त्री’, सुबास भण्डारी, विजय सुब्बा, बिजिता परियार, देवराज राजबंशी, भानुभक्त सिटौला आदिको पनि अभिनय रहेको छ ।मित्र प्रधान (नर) द्वारा निर्देशित फिल्मको कथा शिवम् अधिकारीले लेखेका हुन् ।

छायांकन सौरभ लामाले, द्वन्द्व निर्देशन देव महर्जनले, सम्पादन बनिश शाहले र सीजीआई सत्यम रानाले गरेका छन् । भिएफएक्सको जिम्मेवारी समिर मियाले सम्हालेका छन् । गीत–संगीतमा दीपक शर्मा, विकास चौधरी र थोरम्पो ह्याङ राईको योगदान रहेको छ भने शब्दहरू दीपक शर्मा, विल्सन विक्रम राई, शंकर अधिकारी घायल र खैजडी गीतका लागि अनिश अधिकारीले लेखेका छन् । फिल्म ‘यो मन त मेरो नेपाली हो’ लाई आरआर फिल्म्सले वितरण गर्नेछ ।