आधा दर्जन बढी कलाकारले रवीको पक्षमा हस्ताक्षर गर्दै ऐक्यवद्धता जनाए

इटहरी/ “न्याय पाउने अधिकार सबैको समान हुनुपर्छ” भन्ने मतलाई आत्मसात गर्दै राष्ट्रिय स्वतन्त्र पार्टी (रास्वपा) सभापति रवि लामिछानेप्रति समर्थनका लागि कलाकारहरूले हस्ताक्षर अभियानमा जोशपूर्ण सहभागिता जनाएका छन् ।

नागपोखरीस्थित रेस्टुरेन्टमा आज आयोजित कार्यक्रममा अभिनेता कृष्ण मल्ल, खगेन्द्र लामिछाने, गायक खेम सेञ्चुरी, हास्यकलाकार राजाराम पौडेल, किरण केसी, रामचन्द्र अधिकारी, निर्देशक अशोक शर्मा, दीपेन्द्र के. खनाल र फिल्म पत्रकार प्रकाश सुवेदीलगायतले रवि लामिछानेका पक्षमा हस्ताक्षर गरेर ऐक्यवद्धता देखाएका छन् ।

@parikalanewsofficial

यसअघि अभिनेता विपिन कार्की र रमेश उप्रेतीले पनि रास्वपाको केन्द्रीय कार्यालयमा पुगेर हस्ताक्षर गरिसकेका थिए । आजको हस्ताक्षर कार्यक्रमलाई प्रभावकारी बनाउन रवि लामिछानेकी पत्नी र चलचित्र विकास बोर्डकी पूर्वअध्यक्ष निकिता लामिछाने सक्रिय रुपमा अगुवाइमा थिइन् ।

कार्यक्रममा कलाकारहरूले संसद र अदालत दुवै ठाउँमा निष्पक्ष निर्णय हुनुपर्नेमा जोड दिनुका साथै सबै नागरिकका हक–अधिकारको रक्षा गरिनुपर्छ भन्ने आवाज उठाएका छन् । देशभरि नै जारी हस्ताक्षर अभियानमा सांस्कृतिक क्षेत्रमा कार्यरत कलाकर्मीहरूको सक्रियता थपिएको छ ।