वैदेशिक रोजगारीको यथार्थ बोकेको ‘रियाल रिङ्गेट’ को दोस्रो गीत सार्वजनिक

इटहरी/ नेपाली समाजको यथार्थलाई पर्दामा उतार्न तयार रहेको फिल्म ‘रियाल रिङ्गेट’ ले आफ्नो दोस्रो गीत ‘तिम्रा बाले ज्वाइँ खोजे’ सार्वजनिक गरेको छ। आउँदो श्रावण १६ गते प्रदर्शनमा आउने तयारीमा रहेको यो फिल्मले वैदेशिक रोजगारीको मुद्दालाई गहन रूपमा केलाउने सङ्केत गरेको छ, जसको झलक यस नयाँ गीतमा पनि स्पष्ट देखिन्छ।

रामचन्द्र काफ्ले र जुनू रिजाल काफ्लेको स्वरमा सजिएको ‘तिम्रा बाले ज्वाइँ खोजे’ गीतले प्रेम सम्बन्धमा वैदेशिक रोजगारीले पारेको प्रभावलाई रोचक ढङ्गले पस्केको छ। प्रदीप भारद्वाजको शब्द र रामचन्द्र काफ्लेको संगीत रहेको यस गीतको भिडियोमा अभिनेता प्रमोद चौलागाईं र अभिनेत्री निता अधिकारी को जीवन्त अभिनय र नृत्य रहेको छ।गीतको बोलले नै समाजमा ‘विदेशमा कमाएको ज्वाइँ’ खोज्ने प्रवृत्तिलाई व्यङ्ग्यात्मक रूपमा प्रस्तुत गरेको छ। निता अधिकारीले विदेशिने केटाको अपेक्षा व्यक्त गर्दा प्रमोद चौलागाईंले आफू पनि विदेश जाने तयारीमा रहेको कुराले दुवै पात्रको पृष्ठभूमि र उनीहरूको सम्बन्धको आयामलाई दर्शकमाझ परिचित गराउँछ।

निर्देशक विभोर पोखरेलले ‘रियाल रिङ्गेट’ लाई ‘हरेक नेपालीको कथा’ भनेर दाबी गरेका छन्। उनले यस फिल्मले वैदेशिक रोजगारीमा गएका नेपाली युवा-युवतीले भोग्नुपर्ने यथार्थ र उनीहरूको जीवनशैलीलाई नजिकबाट चित्रण गर्ने बताएका छन्। फिल्म को नाम ‘रियाल रिङ्गेट’ आफैँमा प्रतीकात्मक छ। ‘रियाल’ कतार/साउदी अरेबियाको मुद्रा र ‘रिङ्गेट’ मलेसियाको मुद्रा को संयोजनले नेपाली श्रमिकहरूका प्रमुख गन्तव्य मुलुकहरूलाई सङ्केत गर्छ, जहाँबाट लाखौँ नेपालीहरू आफ्नो परिवारको गुजारा चलाउन र उज्ज्वल भविष्यको खोजीमा छन्

प्रमोद चौलागाईं र निता ढुङ्गानाका साथै छुल्ठिम डोल्मा गुरुङ, रवीन्द्र खड्का, ध्रुव कोइराला, प्रेम सुब्बा, रामचन्द्र अधिकारी, रियर राई लगायतका अनुभवी कलाकारहरूको यस फिल्म मा अभिनय रहेको छ। प्रदीप भारद्वाजको लेखन, रोशन श्रेष्ठको द्वन्द्व निर्देशन, हरि घलेको छायाङ्कन, विपिन मल्लको सम्पादन, किरण तुलाधरको ब्याकग्राउन्ड स्कोर र राजीव समरको कोरियोग्राफीले फिल्म लाई थप सशक्त बनाएको छ।

फिल्म का गीतहरूमा रामचन्द्र काफ्ले, किरण तुलाधर र चन्दन ध्वज केसीको संगीत रहेको छ भने सुगम पोखरेल, केतन क्षेत्री, रामचन्द्र काफ्ले र जुनू रिजाल काफ्लेको स्वर सुन्न सकिनेछ। अमर न्यौपाने, रवि मल्ल, कोसिस क्षेत्री, प्रदीप भारद्वाज र चन्दन ध्वज केसीले गीतमा शब्द दिएका छन्। भारतको राजस्थान, नेपालका चितवन, काठमाडौं र लेटाङमा छायाङ्कन गरिएको ‘रियाल रिङ्गेट’ लाई काफिया फिल्म्सले वितरण गर्नेछ।