सामाजिक सञ्जालको दुर्व्यवहारविरुद्ध प्रहरीको सक्रियता,कवि गुञ्जन राई पक्राउ

इटहरी/ चर्चित गायिका एलिना चौहानप्रति सामाजिक सञ्जालमा अमर्यादित टिप्पणी गरेको आरोपमा कवि गुञ्जन राई पक्राउ परेका छन्। साइबर अपराध अनुसन्धानमा सक्रिय नेपाल प्रहरीको साइबर ब्युरोले उनलाई बुधबार पक्राउ गरेको हो।ब्युरोका प्रवक्ता प्रहरी वरिष्ठ उपरीक्षक एसपी दिपकराज अवस्थीका अनुसार, चौहानको औपचारिक उजुरीको आधारमा ललितपुरबाट गुञ्जनलाई नियन्त्रणमा लिइएको हो। “गायिकामाथि सामाजिक सञ्जालमा आपत्तिजनक भाषा प्रयोग गरिएको उजुरीका आधारमा उनलाई पक्राउ गरिएको हो,” एसपी अवस्थीले बताए।

गुञ्जन राई केही समयअगाडि नेपाल प्रज्ञा प्रतिष्ठानले आयोजना गरेको राष्ट्रिय कविता महोत्सवमा उत्कृष्ट २५ कविको सूचीमा परेका थिए। कवितामार्फत पहिचान बनाएका गुञ्जन अहिले भने अनलाइन व्यवहारका कारण कानुनी घेरामा परेका छन्।गायिका एलिना चौहानले पछिल्लो समय आफूविरुद्ध सामाजिक सञ्जालमार्फत गरिने दुर्व्यवहारविरुद्ध अभियान नै सञ्चालन गर्दै आएकी छन्। ‘गाली गर्नेहरू सार्वजनिक गरौं’ भन्ने उद्देश्यसहित उनले केही समयअघि गुञ्जन राईको सामाजिक सञ्जाल प्रोफाइल सार्वजनिक गरेकी थिइन्।

प्रहरीका अनुसार प्रारम्भिक अनुसन्धानपछि आवश्यक कानुनी प्रक्रिया अघि बढाइनेछ। यता, सामाजिक सञ्जालमा दुर्व्यवहारविरुद्ध देखिएको कलाकारको सक्रियता र प्रहरीको चाँडो प्रतिक्रिया व्यापक रूपमा सराहना पाइरहेको छ।

@parikalanewsofficial