‘गोबर गणेश’ मार्फत बल्छी धुर्बे फिल्म निर्देशनमा डेब्यु

इटहरी/ लोकप्रिय हास्य कलाकार मरिचमान श्रेष्ठ बल्छी धुर्बे ले निर्देशन गर्न लागेको नयाँ फिल्म ‘गोबर गणेश’ को घोषणा गरिएको छ। हास्य र मनोरञ्जनलाई मूल आधार बनाउँदै निर्माण हुने भनिएको यो फिल्म आगामी माघ १ गते रिलिज हुने तय भएको छ।

‘मेरी बास्सै’ जस्ता चर्चित टेलिश्रृंखलाबाट जनप्रिय बनेका मरिचमान पछिल्ला वर्षहरूमा ‘हल्का रमाइलो’ र ‘जुठे’ नामक टेलिचलचित्रको निर्देशन गर्दै आएका छन्। अब भने उनी पहिलो पटक फिल्म निर्देशनमा हात हाल्दै छन्।मरिचमानको आफ्नै ब्यानर बल्छी धुर्बे फिल्म्स को प्रस्तुति रहने यस फिल्ममार्फत टेलिभिजनबाट फिल्म निर्देशनमा उनको यात्राको सुरुआत हुने भएको छ।

फिल्ममा अभिनेत्री वर्षा सिवाकोटीको प्रमुख भूमिका रहने पुष्टि भएको छ। यस्तै, पदम तामाङ, सन्तोष बानिया, माओत्से गुरुङ, सीतादेवी तिमल्सिना र पुजन घिमिरे पुकु लगायतका कलाकारहरू पनि फिल्ममा समावेश हुने अनुमान गरिएको छ, यद्यपि निर्माण पक्षले अझै कलाकारहरूको नाम आधिकारिक रूपमा पुष्टि गरिसकेको छैन।सीतादेवी, हास्य कलाकार केदार घिमिरे माग्ने बुढा की श्रीमती हुन् भने पुजन घिमिरे ‘हल्का रमाइलो’ टेलिश्रृंखलाबाट चिनिएकी कलाकार हुन्। निर्देशक मरिचमानले आफू अभिनय गर्ने वा नगर्ने भन्नेबारे हाल खुलाइएको छैन।

फिल्मको कथा हाल गोप्य राखिएको भए पनि निर्देशक श्रेष्ठका अनुसार ‘गोबर गणेश’ पूर्ण रूपमा हास्य प्रधान फिल्म हुनेछ। “नामले नै जनरा बोलेको छ,” उनले भने, “हामी दर्शकलाई हसाउने उद्देश्यले आएको फिल्म हो। अब विस्तारै कलाकार, कथावस्तु र अन्य जानकारी सार्वजनिक गर्दै जानेछौँ।” फिल्मको डिजिटल पार्टनर ओएसआर डिजिटल रहेको छ भने प्रचार प्रसार टौवा स्टुडियोले डिजाइन गर्नेछ। नेपालभर श्री ब्याकटेस इन्टरटेन्मेन्ट बाट फिल्म वितरण गरिने निर्माण टिमले जनाएको छ।