नीति शाह र पल शाहको 'मोहर'को गीतलाई युट्युवमा १० लाख भ्युज

इटहरी/ देउकी प्रथाको संवेदनशील कथामा आधारित फिल्म ‘मोहर’ को प्रमोशनल गीत ‘चाहिदैन मोहर’ ले पछिल्लो दिनमा युट्युवमा सकारात्मक प्रतिक्रिया सहित भ्युजमा उल्लेख्य वृद्धि भइरहेको छ । रिलिज भएको ९ दिनमै गीतले युट्युबमा १० लाख भ्यूज पार गरेको छ, जसले फिल्मप्रति दर्शकको चासो झनै बढाएको छ ।

ओम प्रतिकको लेखन तथा निर्देशनमा बनेको यो फिल्म साउन २३ गतेदेखि प्रदर्शनमा आउँदैछ । गीतको लोकप्रियतासँगै निर्देशक प्रतिक उत्साहित छन् । उनी भन्छन्, “सुरुमा भ्यूज सुस्त भए पनि हामीलाई विश्वास थियो कि दर्शकले गीतलाई बिस्तारै मन पराउनुहुनेछ । अहिले सामाजिक सञ्जालमा यसको चासो बढ्दो छ ।” हेर्नुस् भिडियो।

शरद हुमागाँई र विशाखा शाहीको स्वर रहेको गीतमा प्रमोद ढुंगानाको शब्द र सुरेश अधिकारीको संगीत छ । रामजी लामिछानेको कोरियोग्राफीमा बनेको भिडियोलाई दर्शकले विशेषगरी पल शाह र नीति शाहको केमिस्ट्रीका कारण मन पराइरहेका छन् । फिल्मको टिजरलाई पनि दर्शकबाट सकारात्मक प्रतिक्रिया प्राप्त भएको छ ।

‘मोहर’ मा पल र नीतिसँगै बेनिशा हमाल, अर्जुन जंग शाही, रविन्द्र झा, मिथिला शर्मा, लक्ष्मी गिरी, मिस पवी लगायतका कलाकारको अभिनय देख्न पाइनेछ । गिरिराज घिमिरे मुख्य सहायक निर्देशक रहेको फिल्मको निर्माता चुम्बन जंग शाही हुन् । फिल्म मेकर्स प्रा.लिको ब्यानरमा निर्माण भएको यो फिल्ममा दीपेन बस्न्यातको छायांकन र भूपेन्द्र अधिकारीको सम्पादन रहेको छ । निर्माण पक्षले अर्को गीत पनि छिट्टै सार्वजनिक गर्ने तयारी गरिरहेको छ ।