इटहरी/ नेपाली फिल्म क्षेत्र अहिले उत्साहजनक अवस्थामा छ, फिल्म रिलिजको घम्साघम्सीले यो क्षेत्र तातेको छ । एकातिर ८२ सालको लागि फिल्महरू लाइनअप भइरहेका छन् भने अर्कोतर्फ दशैं ८३ सालको लागि पनि फिल्महरू घोषणा हुन थालेका छन् । यसै क्रममा, अभिनेत्री नीता ढुंगानाको निर्देशनमा बन्ने फिल्म ‘सुख–दुःख’ आउँदो दशैं २०८३ मा रिलिज हुने औपचारिक घोषणा गरिएको छ ।
पोस्टरमार्फत फिल्म घोषणा तथा प्रदर्शन मिति सार्वजनिक गरिएको यस फिल्मको निर्देशन नीता ढुंगाना आफैंले गर्दैछिन्, जुन उनको निर्देशकको रूपमा डेब्यु फिल्म हुनेछ । बाल कलाकारदेखि अभिनयमा सफल अनुभव सँगालेकी निताले निर्देशनमा चाहिँ कस्तो छलांग मार्छिन् ? त्यो भने प्रतिक्षाको विषय बनेको छ । यो फिल्म उनकै निर्माण कम्पनी ‘निता फिल्म्स’को दोस्रो प्रस्तुति हो ।
यसअघि उनले निर्माण गरेको एक ‘ह्रस्व दीर्घ’ फिल्मले अपेक्षाकृत व्यापार गरेको थियो । भारतीय सुपरस्टार कलाकारहरुको समेत अभिनय रहेका कारण सो फिल्मको चर्चा र हाइप व्यापक थियो । त्यसैको हौसला र अनुभवका साथ उनले पूर्ण लम्बाइको फिल्म ‘सुख-दुःख’ मार्फत निर्देशनको नयाँ यात्रा सुरु गर्न लागेकी हुन् । सार्वजनीक पोस्टरमा देखिएको हरियो पहाडी दृश्य, उदाउँदै गरेको सूर्य र पछाडि चम्किएको रातो घामले जीवनका सुखद र दुःखद पलहरूको प्रतीकात्मकता प्रस्तुत गरेको छ ।
पारिवारिक र भावनात्मक कथा बोकेको यस फिल्मले चाडपर्वको अवसरमा दर्शकसँग गहिरो भावनात्मक सम्बन्ध बनाउने अपेक्षा गरिएको छ । ८२ सालको दशैं नआउँदै ८३ सालको दशैका लागि फिल्म घोषणा हुनु आफैंमा फिल्म निर्माता तथा निर्देशकहरू दशैं जस्ता चाडपर्वलाई कत्तिको गम्भीरता र अवसरको रूपमा लिन्छन् भन्ने कुरा प्रष्ट देखिन्छ । खासगरी पारिवारिक दर्शकलाई लक्षित गर्दै नेपाली फिल्म निर्माताहरूले दशैंमा आफ्ना सबैभन्दा आशालाग्दा प्रोजेक्टहरू प्रदर्शन गर्ने रणनीति अपनाउने गरेका छन् ।
Discussion about this post