एकदेव लिम्बु र नेहा कक्करको युगल स्वरमा लोकप्रिय गीत ‘झिम झिम’ भारतबाट सार्वजनीक

इटहरी/ नेपाली स्वर र संगीतले फेरि एकपटक अन्तर्राष्ट्रिय बजारमा आफ्नो सुखद उपस्थिति देखाएको छ । चर्चित गायक एकदेव लिम्बूको लोकप्रिय गीत ‘झिम झिम’ अब हिन्दी र नेपालीको संयोजनमा नयाँ रूप दिँदै भारतबाट सार्वजनीक गरेका छन् । जसमा बलिउडकी सुपरस्टार गायिका नेहा कक्करको आवाज मिसिएको छ ।

प्लेडीएमएफ नामक भारतीय युट्युब च्यानलमार्फत रिलिज गरिएको गीतमा नेहाले ‘मृग नयनी…’ अन्तरा नेपालीमै गाएकी छन्, जसले नेपाली मौलिकता बचाएको छ भने एकदेवले बाँकी अन्तराहरू हिन्दीमा प्रस्तुत गरेका छन् । स्थायी भाग ‘झिम झिम’ पनि दुवैले नेपाली भाषामै गाएका छन्, जसले गीतलाई दुई भाषा र दुई संस्कृति बीचको सङ्गीतिक सेतु बनाएको छ ।गीतमा रजत नागपालको संगीत रहेको छ भने एकदेव लिम्बू र राना सोतालले संयुक्त रूपमा शब्द लेखेका हुन् । हेर्नुस् भिडियो।

भिडियो निर्देशन स्नेहा सेट्टी कोलीले गरेकी हुन्, जसमा चर्चित कलाकार ऋतविक साहोरे र प्रिया वारियरले अभिनय गरेका छन् । कथावस्तु अनुसार उनीहरू एक विवाह समारोहमा भेटिने जोडीको भूमिकामा देखिन्छन् । यसअघि सुशान्त केसीको ‘बार्दली’ को हिन्दी संस्करण सार्वजनिक भइसकेको छ । जसले भारतमा समेत निकै चर्चा पाएको थियो । अब ‘झिम झिम’ को यो नयाँ संस्करणले पनि नेपाली संगीतको सुगन्धलाई अझ व्यापक दायरामा फैलाउने अपेक्षा गरिएको छ ।