सोभित बस्नेत निर्देशित नेपाली फिल्म ‘पीआर’ को टिजर सार्वजनिक

इटहरी/ अष्ट्रेलियामा रहेका नेपालीहरूको संघर्षमय जीवनशैली चित्रण गर्ने उद्देश्यले तयार गरिएको नेपाली फिल्म ‘पीआर’ को टिजर सार्वजनिक गरिएको छ । निर्देशक शोभित बस्नेतको निर्देशनमा बनेको यो फिल्मको टिजर काठमाडौंमा आयोजित एक पत्रकार सम्मेलनमार्फत सार्वजनिक गरिएको हो । टिजरमा अष्ट्रेलियामा पीआर (Permanent Residency) प्राप्तिको प्रक्रियामा नेपाली युवाले भोग्ने चुनौती, सपना र पीडा समेटिएको देखिन्छ ।

सलोन सलिना फिल्मस्को ब्यानरमा निर्माण भएको यस फिल्ममा सुरज पौडेल, विनिता कार्की, राजन कुँवर, पूजा चौधरी, आश्मा अधिकारी, विमल खत्री, नविन गयाल र कुशल थापाले अभिनय गरेका छन् । फिल्मको छायांकन नेपाल र अष्ट्रेलियाका विभिन्न लोकेशनमा गरिएको छ । लक्ष्मण सापकोटा र प्रदीप दाहालको लगानी रहेको फिल्ममा सौरभ लामाले छायांकन गरेका छन् भने रामजी लामिछानेको कोरियोग्राफी रहेको छ । हेर्नुस् टीजर।

यस्तै मानस राज र भीम वीसीको संगीत, बन्दे प्रसादको सम्पादन, गणेश वुढाथोकीको लेखन र मनोज श्रेष्ठको भीएफएक्स रहेको छ । निर्देशक बस्नेतले केही महिना अष्ट्रेलियामा बिताएर त्यहाँका नेपालीहरूको अनुभवलाई नजिकबाट बुझेको र त्यसकै आधारमा फिल्म बनाएको बताएका छन् । कार्यक्रममा उपस्थित वरिष्ठ कलाकार नीर शाहले फिल्म ‘पीआर’ मा काम गर्न पाएकोमा गर्व महसुस भएको प्रतिक्रिया दिएका छन् ।

@parikalanewsofficial