एलिना चौहानले ‘कमेन्टको अत्याचार धेरै भयो’ भन्दै अभद्र कमेन्ट गर्नेको फोटो सार्वजनिक

इटहरी/ लोकप्रिय गायिका एलिना चौहानले सामाजिक सञ्जालमा आफूमाथि भइरहेका अभद्र टिप्पणी (कमेन्ट) गर्नेहरू विरुद्ध कडा चेतावनी दिएकी छिन् । विशेषगरी, श्रीमानसँगको सम्बन्धविच्छेद (डिभोर्स) पछि यस्ता तुच्छ टिप्पणीहरूको सामना गरिरहेकी एलिनाले अब त्यस्ता व्यक्तिहरूलाई सार्वजनिक गर्ने घोषणा गरेकी हुन् ।

उनले आफ्नो आधिकारिक फेसबुक पेजमा एक स्ट्याटस लेख्दै आक्रोश पोखेकी छिन् । एलिना चौहानले लेखेकी छिन्, “कमेन्ट्सको अत्याचार धेरै भयो अब पालै पालो पोस्ट गर्छु….भाइरल हुन मन लाग्नेहरू आइज है।” उनको यो भनाइले सामाजिक सञ्जालमा कलाकार, विशेषगरी महिला कलाकारहरूले व्यक्तिगत जीवनका उतारचढावका कारण सामना गर्नुपर्ने दुर्व्यवहारलाई प्रस्ट पारेको छ । सो स्ट्याटस पछि उनले अभद्र कमेन्ट गर्नेको कमेन्ट सहित फोटो र फेसबुक लिंक सहित सार्वजनिक गर्न थालेकी छन् ।

यसअघि, अर्की चर्चित गायिका समीक्षा अधिकारी पनि यस्तै समस्याबाट गुज्रिएकी थिइन् । अभद्र टिप्पणीका कारण दिक्क भएर उनले एक व्यक्तिको तस्बिरसहित सामाजिक सञ्जालमा पोस्ट गरेकी थिइन् । तर, उक्त पोस्टपछि सो व्यक्तिले उनलाई लज्जित भाई माफी माग्नुपरेको थियो । समीक्षा अधिकारीको यो घटना सेलाउन नपाउँदै एलिना चौहानले पनि सोही प्रक्रिया अपनाउने चेतावनीसहितको स्ट्याटस पोस्ट गरेकी हुन् ।

@parikalanewsofficial

कलाकारहरूले आफ्नो सिर्जना र प्रस्तुतिमाथि हुने रचनात्मक आलोचनालाई सधैँ स्वागत गर्ने भए पनि व्यक्तिगत जीवनका निर्णयहरूलाई लिएर गरिने व्यक्तिगत मानमर्दन, चरित्रहत्या र अपमानजनक टिप्पणीहरूले उनीहरूलाई मानसिक रूपमा ठूलो तनाव दिने गरेको छ । सामाजिक सञ्जालको गलत प्रयोगसँगै यस्ता समस्याहरू पनि बढ्दै गएका छन्, जसले कलाकारहरूको मानसिक स्वास्थ्यमा नकारात्मक असर पारिरहेको छ ।

यस विषयमा साइबर कानुनको प्रभावकारी कार्यान्वयन र सामाजिक सचेतनाको आवश्यकता झन् टड्कारो देखिएको छ । कसैको व्यक्तिगत जीवनमाथि अतिरञ्जित टिप्पणी गर्ने अधिकार कसैलाई पनि नहुने र यस्ता कार्यहरू निन्दनीय रहेको कुरामा सबै सचेत हुनुपर्ने देखिन्छ । कलाकारहरूलाई सुरक्षित र सम्मानजनक वातावरणमा आफ्नो कला प्रस्तुत गर्न दिइनुपर्छ भन्ने आवाज यतिबेला झन् बलियो बन्दै गएको छ ।