नेपाली पौराणिकता, फ्यान्टासी र प्रविधिको संगम लिएर ‘महाकाव्य’ निर्माण हुँदै

इटहरी/ नेपाली फिल्म उद्योगलाई नयाँ उचाइमा पुर्‍याउने ध्येयसहित ‘महाकाव्य’ नामक फ्यान्टासी फिल्म निर्माणको तयारी तीव्र रूपमा अघि बढिरहेको छ । ऐतिहासिक र पौराणिक कथाको गहिरो पृष्ठभूमिमा आधुनिकीकरणको स्वाद मिसाउँदै निर्माण हुन लागेको यो फिल्मले विश्वस्तरीय भिजुअल इफेक्ट्स, धमाकेदार एक्सन र भिन्न शैलीको कथावाचनमार्फत नेपाली फिल्म क्षेत्रमै नयाँ बाटो खोल्ने दाबी गरिएको छ ।

‘खुसी फिल्म्स’ को ब्यानरमा बन्न लागेको फिल्मको निर्देशन चर्चित म्युजिक भिडियो निर्देशक मदन खड्काले गर्दैछन् । ‘महाकाव्य’ उनको पहिलो फिचर फिल्म हुनेछ । एक्सन निर्देशकको रूपमा शुक्रराज शाह यो फिल्ममा जोडिएका छन् । निर्माण टिमका अनुसार फिल्मको प्रि-प्रोडक्सन चरण तीव्र गतिमा अगाडि बढिरहेको छ । फिल्मको थिम पोस्टरले दर्शकको ध्यान खिचेको छ ।

सार्वजनीक पोस्टरमा दुई ज्वालामुखी भालुहरूबीचको टक्कर देखाइएको छ-शक्तिशाली प्रतीकात्मकता बोकेको यो दृश्यले फिल्मको गहिरो, रहस्यमय र साहसिक यात्राको संकेत गर्छ । पोस्टरमा लेखिएको रहस्यमयी प्रश्न “को हो त्यो आवाज जसले महाकाव्य लेख्नेछ ?” मार्फत फिल्मले दर्शकको जिज्ञासा थप बढाएको छ । फिल्ममा मुख्य भूमिकाका लागि एक नयाँ अनुहारलाई प्रस्तुत गरिँदैछ । निर्माण टिमका अनुसार, उनले फिल्मका लागि शरीर निर्माणदेखि लिएर एक्सन र नृत्यको कडा तालिम लिएका छन् । हाल उनी अन्तिम तयारीमा छन् । फिल्मको छायांकन आगामी भदौ महिनादेखि सुरु हुने तयारीमा छ ।

@parikalanewsofficial

निर्माता शान्ती मगरको लगानीमा निर्माण हुन लागेको ‘महाकाव्य’ले महादेवको शक्ति, अनुपम प्रेमकथा र रहस्यले भरिएको साहसिक यात्रामार्फत नेपाली पौराणिक मिथक, संस्कृति र हराउँदै गएका पवित्र स्थलहरूलाई आधुनिक फिल्मको पर्दामा जीवन्त बनाउने लक्ष्य राखेको छ । फिल्म केवल कथा नभएर एक सिनेम्याटिक यात्राको रूपमा प्रस्तुत हुँदैछ-जहाँ अतीत र भविष्य, परम्परा र प्रविधि, कल्पना र यथार्थको अनौठो मेल भेटिनेछ । ‘महाकाव्य’ ले नेपाली फिल्मलाई केवल देशभित्र होइन, अन्तर्राष्ट्रिय स्तरमा पनि गर्वका साथ चिनाउने आशा गर्न सकिन्छ ।