स्वर्गीय निर्देशक शिव रेग्मीको सम्झनामा फिल्म ‘हर्ष’ मंसिर १२ मा रिलिज हुने

इटहरी/ स्वर्गीय निर्देशक शिव रेग्मीको सम्झनामा बनेको पारिवारिक सामाजिक फिल्म ‘हर्ष’ आगामी मंसिर १२ गतेबाट देशव्यापी प्रदर्शनमा आउने भएको छ । सोमबार सार्वजनिक गरिएको टाइटल भिडियोमार्फत निर्देशक एकता पौडेलले फिल्मको प्रदर्शन मिति घोषणा गर्दै यसलाई आफ्ना ‘मामा’ स्वर्गीय रेग्मीलाई समर्पित रहेको बताएकी छन् । ‘हर्ष’ एकता पौडेलको डेब्यु निर्देशन हो ।

न्यूयोर्क फिल्म एकेडेमीबाट फिल्म मेकिङ अध्ययन गरेकी तथा आमसंचार र व्यवस्थापनमा उच्च शिक्षित पौडेलले यसअघि केही छोटा फिल्म निर्देशन गरिसकेकी छन् । पूर्ण रूपमा चितवनमा छायांकन गरिएको फिल्मको हाल पोस्ट–प्रोडक्सन कार्य चलिरहेको छ । फिल्ममा खगेन्द्र लामिछाने, वर्षा राउत, निर शाह, सन्तोष पन्त, शर्मिला मल्ल, माओत्से गुरुङ, विशाल पहाडी, निमा पाण्डे, लुनिभा तुलाधर, अंशु महर्जन, रेनु प्रधान, सुवर्ण थापा, श्रृष्टि महर्जन र संगीता नापितको अभिनय छ ।

अष्टलक्ष्मी प्रोडक्सन्स् र ई-प्राईम मुभिजको ब्यानरमा निर्माण भएको ‘हर्ष’को कथा स्वयं निर्देशक पौडेलले लेखेकी हुन् । फिल्ममा आलोक शुक्लाको छायांकन, समीर/हिमाल, वसन्त सापकोटा र एलिश कार्कीको संगीत, लोकेश बज्राचार्यको सम्पादन तथा सुनिल क्षेत्री र पौडेलकै कोरियोग्राफी रहेको छ । निर्माता प्रशन्न पौडेल र विकास पौडेल छन् भने कार्यकारी निर्माता हिक्मत चोखल हुन् ।

@parikalanewsofficial

फिल्मका गीतमा स्वर्गीय शिव रेग्मी, डा. कृष्णहरी बराल, पवित्रा घिमिरे र नीरकमल खड्काको शब्द रचना छ । इश्वर घिमिरे प्रोडक्सन म्यानेजर, कुलदीप अधिकारी मुख्य सहायक निर्देशक रहेका छन् । गोविन्द शाहीको काफिया फिल्म्सले फिल्म वितरण गर्नेछ भने डिजिटल अधिकार बुढासुब्बा डिजिटलले खरिद गरेको छ । निर्देशक पौडेल भन्छिन्, “हर्ष हाम्रो टीमको मेहनत र भावनाले भरिएको चलचित्र हो, जुन दर्शकलाई मन छुने अनुभव दिनेछ।”