बिजुवा संस्कृतिको कथा बोल्ने फिल्म ‘नाकछोङ’को फर्स्टलुक सार्वजनिक

इटहरी/ नेपाली समाजको मौलिक संस्कृति र परम्परालाई फिल्ममार्फत प्रस्तुत गर्ने प्रयासस्वरूप निर्माता ज्योतीराज राईले निर्माण गरेको फिचर फिल्म ‘नाकछोङ’ को फष्टलुक्स सार्वजनिक गरिएको छ । काठमाडौँ पृष्ठभूमिमा देखिएको गहिरो प्रतीकात्मक पोस्टरमा फिल्मका प्रमुख अभिनेता भुवन सिंह राईलाई फिचर्ड गरिएको छ, जसले फिल्मको कथावस्तुमा रहस्य र गहिराइको आभास गराउँछ ।

फिल्मका प्रस्तुतकर्ता ज्योतीराज राई हुन् भने निर्देशन किरण राईको रहेको छ । किरणले यसअघि ‘लुङा’ र ‘जिउपंचौ’ निर्देशन गरिसकेका छन् । ‘नाकछोङ’ उनको तेस्रो निर्देशन हो, जसको पटकथा किरण स्वयंले निर्माता ज्योतीराजसँगको सहकार्यमा तयार गरेका हुन् । निर्माता ज्योतीराजका अनुसार फिल्म आफ्ना परम्परागत मूल्य र संस्कृतिलाई जोगाउँदै पुस्तान्तरणको माध्यम बन्ने उद्देश्यले निर्माण गरिएको हो ।

फिल्मको कथावस्तुमा राई समुदायको जीवनशैली, चाडपर्व, विवाह संस्कार, कुलपितृ पूजा लगायतमा अनिवार्य प्रयोग हुने बिजुवा (नाकछोङ) लाई केन्द्र बनाइएको छ। यिनै प्रतीकहरूलाई चित्रण गर्दै फिल्म तयार पारिएको हो, जुन परम्परा र आधुनिकता बीचको पुल बन्ने अपेक्षा गरिएको छ । फिल्ममा भुवन सिंह राईसँगै यासेली योङ्हाङ, शुष्मा सुब्बा गुरुङ, सारा राई, ताया हाङ राई, अनुशा राई, सरोज राई, पूर्ण लिम्बु, त्रिचु राई, सागर केरुङ, बबिन राई, हेम दिलुङ्छा राई, विनोद पोमो लगायतको अभिनय छ ।

@parikalanewsofficial

यस्तै बाल कलाकार जेशन राईको समेत अभिनय रहेको फिल्मको छायांकन बाबु श्रेष्ठले गरेका छन् भने संगीत दिनेशकाजी वान्तवा, अनिल कोई राईले दिएका छन् । गीतमा राजन मुकारुङ र विष्णु किरातीका शब्द तथा नोगेन लिम्बु र परेस राईको स्वर रहेको छ ।

फिल्म स्वदेशी तथा अन्तर्राष्ट्रिय फिल्म महोत्सवमा प्रदर्शन गरिएपछि मात्र नेपालमा सार्वजनिक रूपमा प्रदर्शन गरिने बताइएको छ । प्रदर्शन मिति भने अझै टुंगो लागेको छैन । यसअघि ‘लुङ्गा’, ‘संगम’, ‘त्रिवेणी’, ‘पापी मान्छे’, ‘वान वे’, ‘प्रोडूसर’ लगायतका फिल्म निर्माण गरिसकेका निर्माता ज्योतीराजले यसपटक पनि परम्परा र पहिचान जोगाउने सन्देशसहित नयाँ फिल्ममार्फत दर्शकमाझ आउन लागेका हुन् ।