आधा ढोका खुलेको ‘लालीबजार’ लुक्स: स्वस्तिमा खड्का गर्वभवती

इटहरी/ नेपाली फिल्म क्षेत्रमा सफल शृङ्खला ‘जात्रा’ बाट दर्शकको मन जितेको व्यानर षट्कोण आर्ट्सले आफ्नो पाँचौँ एकल प्रस्तुति ‘लालीबजार’ घोषणा पश्चात पहिलो क्यारेक्टर लुक्स सहित पोष्टर सार्वजनीक गरेको छ । सार्वजनीक पोष्टरमा अभिनेत्री स्वस्तिमा खड्का फरक अवतारमा देखिँएकी छन् । उनलाई बोल्ड लुक्स सहित गर्भवती महिलाको अवतारमा प्रस्तुत गरिएको छ । यसर्थ फिल्मको नाम र यो क्यारेक्टर लुक्सलाई हेर्दा फिल्मले वेश्यावृत्तिको कथा उठान गर्छ भन्ने अनुमान लगाउन सकिन्छ ।

‘जात्रा’, ‘जात्रै जात्रा’, ‘महापुरुष’ र ‘महाजात्रा’ जस्ता चर्चित फिल्म निर्माण गरेर दर्शक र प्रदर्शक दुवैको विश्वास जितिसकेको व्यानरले फागुन १ गतेलाई प्रदर्शन मिति तय गर्दै ‘लालीबजार’ को फर्स्टलुक पोस्टर सार्वजनिक गरेको हो । यस फिल्मको निर्देशन यम थापाले गर्दैछन् भने निर्माणमा रवीन्द्रसिंह बानियाँ र म्याक्स दीपेस खत्री छन् । कार्यकारी निर्माता भने प्रदीप भट्टराई रहेका छन् । निर्देशक थापाको लेखनमा आधारित यो फिल्मले उनको करिअरलाई नयाँ उचाइमा पुर्‍याउने विश्वास राखिएको छ ।

स्वस्तिमाले फिल्मको कथावस्तु र टिमप्रति विश्वासका कारण आफूले नयाँ चुनौती लिएको बताएकी छन् । उनले भनिन्, “मेरा अघिल्ला फिल्मभन्दा पूर्ण फरक छ यो । पोस्टरले नै धेरै कुरा बोलेको छ, म यो पात्रलाई जीवन्त बनाउन उत्साहित छु ।” निर्माता बानियाँका अनुसार, निर्देशक यम थापासँगको सहकार्य स्क्रिप्टकै आधारमा सुरु भएको हो । ‘हामी विभिन्न लेखक-निर्देशकहरूसँग छलफलमा थियौँ,’ उनले भने, ‘यमजीको स्क्रिप्टले खासै छोयो । उहाँले स्क्रिप्ट दिनुभएको थियो, हामीले निर्देशन पनि उहाँलाई नै गर्न प्रस्ताव गर्यौँ ।’

@parikalanewsofficial

केही समय निर्देशनबाट विश्राम लिएका थापाले यसपटकको फिल्म निर्माण प्रक्रिया आफ्नो लागि चुनौती र अवसर दुवै भएको बताएका छन् । ‘षट्कोण आर्ट्समा आइपुगेपछि मैले एउटा आइडिया सेयर गरें, उनीहरूले मन पराएपछि निर्देशनको जिम्मेवारी पाएँ,’ उनले भने । ‘लालीबजार’ दसैंपछि छायांकनमा जाने तयारमा छ । फिल्मको पोस्टर केशव पाण्डेले खिचेका हुन् भने डिजाइन रोयल भीमसेन (ट्राइडेन्ट कन्सेप्ट) को हो । ‘लालीबजार’ को थप कलाकार र विषयवस्तुबारे जानकारी क्रमशः सार्वजनिक गरिने निर्माण टिमले जनाएको छ ।