शोकमा कलकतियावाली: विवाह भएको ६ महिनामै श्रीमती झुण्डिएको अवस्थामा मृत फेला

इटहरी/ केही महिनाअघि मात्र विवाह बन्धनमा बाँधिएर गृहस्थ जीवनमा प्रवेश गरेका जनकपुरका चर्चित कलाकार कलकतियावाली उपनामले परिचित अभिनास झा अहिले शोकमा डुबेका छन् । उनकी पत्नी अँसा सदा झुन्डिएको अवस्थामा मृत फेला परेकी छन् ।

धनुषाको जनकपुरधाम उपमहानगरपालिका–२० स्थित नोचापुरमा रहेको सुटिङ सेट नजिकैको आफ्नै कोठामा अँसा सोमबार राति झुन्डिएको अवस्थामा फेला परेको जिल्ला प्रहरी कार्यालय धनुषाका प्रवक्ता बरुणबहादुर सिंहले जानकारी दिए ।
मंगलबार बिहान मृत्युवारे खबर प्राप्त भएपछि प्रहरीको टोली तत्काल घटनास्थलमा पुगेको थियो ।

@parikalanewsofficial

घटनास्थल आसपासका सबै डिजिटल डिभाइसहरू नियन्त्रणमा लिई अनुसन्धान अगाडि बढाइएको प्रहरी स्रोतको भनाइ छ । पोष्टमार्टम रिपोर्ट प्राप्त नभएसम्म मृत्युको यकिन कारण नखुल्ने जनाउँदै प्रहरीले यस घटनालाई शंकास्पद मानेको छ । ६ महिनाअघि अन्तरजातीय विवाह गरेका अभिनास र अँसाले हालै विधिपूर्वक गृह प्रवेश गरेका थिए । अँसा सदा पनि ‘कलकतियावाली’ शोमा कलाकारको रूपमा काम गरेर चर्चामा आएकी थिइन् ।

धनुषाधामकी बासिन्दा अनिसा पाँच वर्षदेखि कलकतियावालीको टोलीमा कलाकारको रूपमा संलग्न थिइन् । बिस्तारै दुवैबीच प्रेम झाङ्गिएको थियो । तर, यो कुरा टोलीका अन्य कलाकारलाई कसैलाई थाहा थिएन । विवाह गर्ने सल्लाहपछि मन्दिरमा एकअर्कालाई माला र सिन्दुर लगाएर जीवनभर सँगै मर्ने बाँच्ने कसम खाएका थिए । अन्तरजातिय विवाह भएका कारण सुरुमा परिवारले असहमति जनाएपनि पछि दुवैलाई स्वीकार गरेका थिए ।