इटहरी/ सार्वजनिक व्यक्ति भएकै कारण असभ्य टिप्पणीको सिकार बन्नुपरेको अनुभव गर्दै गायिका समीक्षा अधिकारीले एक सामाजिक सञ्जाल प्रयोगकर्ताको अभद्र व्यवहारको सार्वजनिक पर्दाफास गरेकी छन् । उनले सामाजिक सञ्जालमार्फत उक्त प्रयोगकर्ताको कमेन्ट र तस्बिर सार्वजनिक गरेपछि ती व्यक्तिले तुरुन्तै माफी मागेका छन् । ती प्रयोगकर्ताले लेखेका छन्, “समीक्षा बहिनी, जे लेखियो त्यसको लागि हृदयदेखि माफी माग्छु । यसलाई लामो बनाउनुभन्दा फेरि भेट हुँदा हात जोडेर माफ मागुँला…!! अब।”
समीक्षाले पनि माफी स्वीकार्दै, संयमित र सशक्त शैलीमा आफ्नो धारणा राखेकी छन् । उनले लेखेकी छन्, “माफीको दायरालाई मैले नाघ्न सकिनँ, त्यसैले उहाँलाई माफ गरेँ। तर अरूलाई आफ्नो व्यक्तित्व चिनाउनु पूर्व, पहिलो आफूलाई चिन्नुहोस्। संघर्षको मैदानमा लडेर पनि उठेको मान्छे म हुँ। अरूलाई लडाउँछु भन्दा आफू पनि लडिन्छ भन्ने कुरा सबैले बुझ्नुहोला।”
उनले पोस्टमा प्रयोगकर्ताको अभद्र कमेन्टसहितको स्क्रिनसट र आफ्ना पारिवारिक तस्बिरहरू सेयर गरेकी थिइन्, जुन भाइरल भएको थियो । समीक्षाको यो हिम्मतिलो र आत्मसम्मानजनक प्रतिक्रिया सामाजिक सञ्जाल प्रयोगकर्ताहरूले खुलेर समर्थन गरेका छन् । धेरैले उनलाई निरन्तर आफ्नो बाटोमा दृढ भएर अघि बढ्न सुझाव दिएका छन् । यो घटनाले कलाकारप्रतिको सम्मान र सामाजिक सञ्जालको जिम्मेवार प्रयोगबारे पुनः सोच्न बाध्य बनाएको छ ।
@parikalanewsofficial
Discussion about this post