दुर्गेश थापाको ‘दुश्मन हेरेको हेरै’गीत ५ महिनामै १०० मिलियन क्लबमा प्रवेश

इटहरी/ नेपाली संगीत क्षेत्रमा पछिल्लो समय ‘स्टेज किंग’को रुपमा ख्याति कमाएका प्रफमर, गायक तथा मोडल दुर्गेश थापाको गीत ‘दुश्मन हेरेको हेरै’ले नयाँ इतिहास रचेको छ । सार्वजनिक भएको ५ महिनामै यो गीतको भिडियोले युट्युबमा १०० मिलियन अर्थात् १० करोडभन्दा बढी भ्युज कटाउन सफल भएको हो । भिडियोले विश्व संगीत दिवसकै दिन यो ऐतिहासिक क्षण बनाएको हो ।

‘दुश्मन हेरेको हेरै’ गीतमा दुर्गेश थापाकै शब्द र संगीत रहेको छ । यो गीतमा आनन्द कार्की, दुर्गेश थापा स्वयं, समीक्षा अधिकारी र एलिना चौहानको स्वर सुन्न सकिन्छ । गीतको म्युजिक भिडियोमा दुर्गेश थापासँगै अभिनेत्री प्रियंका कार्की, कविता नेपाली र पेमा लामाको अभिनय रहेको छ । यो गीत लोकप्रिय हुनुमा यसको आकर्षक पर्फमेन्स र कलाकारको अभिनयले महत्त्वपूर्ण भूमिका खेलेको छ । यो गीत नेपालमा मात्र नभई विदेशमा समेत व्यापक रुचाइएको छ र युट्युबको ग्लोबल ट्रेन्डिङमा समेत परेको थियो । हेर्नुस् भिडीयो ।

छोटो समयमा यो इतिहास रच्न सफल भएपछि गायक थापाले सामाजिक सञ्जालमा एक स्ट्याटस लेखेका छन् । उनले आफ्ना दर्शक तथा शुभचिन्तकहरूलाई ‘भगवान’ को संज्ञा दिँदै उनीहरूकै माया, साथ र आशीर्वादले यो सफलता मिलेको बताएका छन् । थापाले लेखेका छन्, “म भावुक छु, अभिभूत छु… किनभने हजुरहरू मेरो भगवान दर्शकहरू ले दिनुभएको माया, साथ र आशीर्वादले हाम्रो सृजना एउटा असाध्यै ठूलो उचाइ चुम्न सफल भयो ।” उनले यो सफलता केवल आफ्नो नभएर दर्शकहरूको समेत विजय भएको बताएका छन् ।

“आज म खुशी छु —तर मलाई थाहा छ, मभन्दा कैयौं गुणा हजुरहरू खुशी हुनुहुन्छ, किनभने यो हाम्रो विजय हो, हाम्रो गर्व हो,” उनले थपेका छन् । दुर्गेश थापाका अनुसार यो १०० मिलियन भ्युज केवल संख्या मात्र नभएर सपना पूरा भएको दस्तावेज हो । उनले दर्शकहरूले दिएको साथले आफ्नो परिचय अझ चम्किलो बनेको उल्लेख गर्दै “दुर्गेश थापा” अब नाम मात्र नभएर एक ‘ब्रान्ड’ बनेको दाबी गरेका छन् । उनले सधैंको साथ, माया, समर्थन र भगवानसरहको उपस्थितिका लागि सम्पूर्ण दर्शकहरूलाई शीर झुकाएर कृतज्ञता व्यक्त गरेका छन् । “हजुरहरू नभई यो सम्भव थिएन । हजुरहरूसँगै छु, त्यसैले सम्भव छ,” उनले अन्त्यमा लेखेका छन् ।

@parikalanewsofficial