पल शाह अझै ‘महाराजधिराज’प्रति सकारात्मक, के फिल्ममा उनको रि-इन्ट्री होला ?

इटहरी/ लामो समयदेखि चर्चामा रहेको फिल्म ‘महाराजधिराज’ बाट अभिनेता पल शाह बाहिरिएपछि विभिन्न अड्कलबाजी भइरहेका बेला निर्माण टिमले अर्को एक धारणा सार्वजनीक गरेको छ । पल शाहले एक अन्तर्वार्तामा दिएको भिडियो क्लिप सहित फिल्मका निर्देशक परिक्षद सेन र निर्माता विराज विष्टले एकै प्रकृतिको लामो स्ट्याटस सामाजिक संजालमा पोष्ट्याएका छन् । टिमले अभिनेता शाहसँग कुनै पनि प्रकारको मनमुटाव नभएको र आपसी सहमतिमै उनी फिल्मबाट अलग भएको जनाएको छ ।

निर्माण टिमको भनिएको छ, “सुरुमा नै यो कुरा स्पष्ट पार्न चाहन्छौं: ‘महाराजधिराज’को कानुनी सम्झौता यस्तो थियो कि न त कलाकार (पल शाह ज्यु) ले चाहँदैमा यो फिल्म छाड्न सक्थे, न त हामीले हटाउन चाहादैमा हटाउन सक्थ्यौं। माघदेखि असोजसम्मको लागि सम्झौता गरिएको थियो। तर, शाह अभिनित अन्य चलचित्र “मायाको रङ्गहरु” र “मोहोर” को छायांकन तालिका लम्बिएका कारण “महाराजधिराज” को छायांकनमा स्वभाविक ढिलाइ भएको” टिमको भनाइ छ।

“पल शाह ज्यु ले माघसम्म ‘मायाको रङ्ग’ र त्यसपछि ‘मोहोर’ को छायांकन सकेर निर्धक्कसँग ‘महाराजधिराज’ मा जोडिने हाम्रो तालिका थियो,” स्ट्याटसमा उल्लेख छ, “तर उहाँको चलचित्र ‘मोहोर’को छायांकन वैशाखको पहिलो हप्तासम्म लम्बिँदा हाम्रो योजनामा ढिलाइ भयो । हामीले उहाँलाई एकैसाथ दुईवटा फिल्ममा व्यस्त रहँदा असहजता नहोस् भनेर दबाब दिन चाहेनौं ।”

पछि अभिनेता शाहले आफ्नै निर्माण कम्पनीबाट बन्न लागेको चलचित्र “यानिमाया”का लागि श्रावण महिना आवश्यक पर्ने जानकारी गराएपछि दुवै पक्षबीच सौहार्दपूर्ण छलफल भएको थियो । सोही छलफलपछि शाहलाई “महाराजधिराज” बाट अलग भएर आफ्नो नयाँ प्रोजेक्टमा काम गर्न दिने निर्णयमा पुगेको निर्माण पक्षले जनाएको छ । “यो पूर्णतः आपसी सहमति र बुझाइमा आधारित निर्णय थियो । ‘महाराजधिराज’ को टिम र पल शाहबीचको सम्बन्धमा कुनै कटुता छैन; बरु यो निर्णयले हाम्रो आत्मिक सम्बन्धलाई अझ प्रगाढ बनाएको छ,” टिमले भनेको छ ।

@parikalanewsofficial

निर्माण टिमले “महाराजधिराज”लाई केवल पैसा कमाउने माध्यम नभएर आफ्नो वर्षौंको अथक प्रयास, पसिना र सपनाको साकार रूप भएको बताएको छ। “यो चलचित्रमार्फत तपाईंले कहिलै नदेखेको, सोच्दै नसोचेको एउटा अर्को आँखाबाट संसार देख्न पाउनुहुनेछ भन्ने हाम्रो विश्वास छ । हामीले यसमा आफ्नो आत्मा नै खन्याएका छौं,” सो स्ट्याटसमा भनिएको छ । टिमले यस विषयलाई बंग्याएर कुनै पनि पक्षलाई नकारात्मक रूपमा प्रस्तुत नगरिदिन सञ्चारमाध्यम र दर्शकसँग आग्रह गरेको छ ।

सार्वजनीक एक अन्तर्वार्तामा भने अभिनेता पल शाहले यो फिल्मको बारेमा सकारात्मक प्रतिक्रिया जनाएका छन् । उनको कुरा गराई अनुसार उनलाई अझै यो फिल्ममा जोडिएर काम गर्न मन छ । सोही अनुरूप ले उनले अन्तर्वार्ताबाटै फिल्म छायांकन तिहारपछि सार्नुस म ढुक्कले समय दिन तयार छु भनेका छन् । यसरी हेर्दा के फेरि अभिनेता शाहको ‘महाराजधिराज’मा रि-इन्ट्री होला त ? भन्ने प्रश्न उब्जिएको छ । यसै प्रसंगमा महाराजधिराजका निर्माता विराज विष्ट सँग कुरा गर्दा भने उनले अब पल शाह यो फिल्ममा रि-इन्ट्री हुने सम्भावना नरहेको बताएका छन् । पल शाह बाहिरिए सँगै यो फिल्मको रिलिज मिति पनि अन्यौल भएको छ । यसअघि आगामी दशैँको फूलपातीमा रिलिज तय गरिएको थियो ।