फिल्म ‘आहुती’ पश्चात ‘आहुती-२’ को छायांकन सुरु, केही साताको अन्तरमा रिलिज गरिने

इटहरी/ सांगीतिक सफलता पश्चात लोकप्रिय लोकदोहोरी गायक प्रकाश दुतराज नेपाली फिल्ममा समेत देखिने भएका छन् । फिल्म ‘आहुती’ बाट आफ्नो फिल्मी अभिनय यात्रा सुरु गरेका छन् । लामो समयदेखि संगीतमार्फत दर्शकमाझ छुट्टै पहिचान बनाएका उनले अब नेपालि फिल्म उधोगमा पाइला राखेका हुन् । ‘आहुती’को छायांकन केही साताअघि गोप्य रूपमा सम्पन्न गरिएको छ भने फिल्ममा साम्राज्ञी राज्यलक्ष्मी शाहसँग प्रकाशको जोडी देखिन लागेको हो ।

निर्देशक तथा निर्माता भवानी संग्रौलाको नेतृत्वमा बनेको यो फिल्म यति गोप्यरूपमा तयार पारिएको छ कि यसको सिक्वेल ‘आहुती–२’ को पनि छायांकन अघि बढाइसकिएको छ । चलचित्र विकास बोर्डले जेठ महिनामा दोस्रो भागको निर्माण इजाजत दिएको थियो, जसमा अञ्जली अधिकारी र ‘हर्के हल्दार’का नामले चिनिने अभिनेता विष्णु प्रसाद सापकोटा अनुबद्ध छन् ।

‘अनिल संग्रौला मुभी मेकर प्रा.लि.’ को ब्यानरमा निर्माण भइरहेको फिल्ममा बाल कलाकार आयुषी ढकालको पनि रहेको छ । त्यस्तै ‘होस्टेल ३’ का अभिनेता रिहान गिरीको प्रवेश भने दोस्रो भागबाट हुनेछ । साथै, करिश्मा मानन्धरले पनि फिल्ममा अभिनय गरेकी छन् । फिल्म युनिटले ‘आहुती’ र ‘आहुती-२’ लाई केही साताको अन्तरमा रिलिज गर्दै दर्शकलाई क्रमशः दुइटा कथाको यात्रा दिन चाहेको बुझिएको छ, जुन नेपाली फिल्म क्षेत्रमा कमै देखिएको प्रयोग हो । तर, फिल्मको रिलिज मिति भने हालसम्म तय भएको छैन ।

@parikalanewsofficial