सेलेब्रेटीहरुले फिल्म ‘महाभोज’ हेरेर दिए सकारात्मक प्रतिक्रिया

ईटहरी/ सामाजिक यथार्थ र मानवीय संवेदनशीलताको गहिरो चित्रण गरिएको नेपाली फिल्म ‘महाभोज’ ले प्रदर्शनको पहिलो दिनदेखि नै दर्शकको मन जित्न सफल भएको छ । शुक्रबारदेखि देशभरका हलमा प्रदर्शनमा आएको यो फिल्मलाई दर्शकहरूले अत्यधिक सकारात्मक प्रतिक्रिया दिइरहेका छन् । हलबाट निस्कने दर्शकहरूको अनुहारमा सन्तुष्टि झल्किनुका साथै फिल्म हलमा गुञ्जिएको दृश्यले यसको प्रभाव दर्शाउँछ ।

सहकारी ठगीजस्ता विषयवस्तु उठाउँदै फिल्मले केवल मनोरञ्जन मात्र नभई सामाजिक शिक्षाको भुमिका पनि खेलेको दर्शकहरूको भनाइ छ । “फिल्मले मलाई भावुक पनि बनायो, आक्रोशित पनि,” एक दर्शकले बताए, “यसले हाम्रो समाजको यथार्थलाई यस्तो सशक्त ढङ्गमा देखाएको छ कि मैले फिल्म हेर्दा छेउछाउ बिर्सिएँ।” अर्का एक दर्शकले त यसलाई ‘शिक्षा र आन्दोलनको मेल’को रूपमा व्याख्या गरे ।

यसैबीच सोमबार साँझ काठमाडौंमा आयोजित विशेष शोमा नेपाली कला, साहित्य र सामाजिक क्षेत्रका विशिष्ट व्यक्तिहरूको उपस्थिति देखियो । हरिवंश आचार्य, सरोज खनाल, जितु नेपाल, आयुष्मान देशराज जोशी, परीक्षा लिम्बु, निर्देशक तुलसी घिमिरे, नवीन चौहान, प्रदीप भट्टराई, साहित्यकार अमर न्यौपाने, विवेक ओझा, विश्लेषक मुमाराम खनाल, समाजशास्त्री निर्मला ढकाल लगायतले ‘महाभोज’ हेरेर आफू प्रभावित भएको प्रतिक्रिया दिए ।

@parikalanewsofficial

साहित्यकार अमर न्यौपानेले फिल्मले कानुनी राज्यमाथि गहिरो प्रश्न उठाएको बताए । “२०८२ सालको गणतान्त्रिक व्यवस्थामा पुगे पनि सहकारी पीडितहरूलाई न्याय नपाउनु विडम्बना हो,” उनले भने, “कानुनले काम नगर्दा बल प्रयोग गर्नुपर्ने हो त भन्ने प्रश्न फिल्मले उठाएको छ।”

वरिष्ठ कलाकार हरिवंश आचार्यले भने, “जनताको पैसा कसरी अपचलन हुन्छ भन्ने कुरा फिल्मले खुलस्त देखाएको छ ।” सरोज खनालले थपे, “मान्छेलाई मर्न बाध्य बनाउने तिनै शक्तिहरू हुन्, जसलाई फिल्मले गहिरो सन्देशका साथ चित्रण गरेको छ ।” जितु नेपालले फिल्मको यथार्थपरकता र मनोरञ्जनात्मक पक्षको प्रशंसा गरे । परीक्षा लिम्बुले फिल्मले नेतृत्वको असर कसरी जनजीवनमा पर्छ भन्ने कुरालाई प्रभावकारी तरिकाले प्रस्तुत गरेको बताइन् । निर्देशक नवीन चौहानले निर्देशक दिनेश राउतको यो फिल्मलाई ‘आजसम्मकै उत्कृष्ट’ ठहर गरे ।

‘महाभोज’ दिनेश राउतको निर्देशन र विकास सुवेदीको लेखनमा तयार गरिएको हो । क्लक वर्क क्रियसन र पिक्चर फ्रेमको संयुक्त प्रस्तुति रहेको यो फिल्ममा आर्यन सिग्देल, दयाहाङ राई, खगेन्द्र लामिछाने, अञ्जना बराइली, मलिका महत, गौमाया गुरुङ, बुद्धि तामाङ, विनोद न्यौपाने, कमलमणि नेपाल, मोहन निरौला, वसुन्धरा भुसाल, सुरक्षा पन्तजस्ता कलाकारहरूको सशक्त अभिनय देख्न पाइन्छ ।