इटहरी/ कथा वाचनमार्फत लाखौँ श्रोताको मनछुन सफल भएका साईग्रेस पोखरेलले आफ्नो जीवन यात्रा, अनुभव र भावना समेटिएको पुस्तक ‘साईग्रेस: द स्टोरीटेलर’ को विमोचन गरेका छन् । अमेरिकाको कोलोराडोमा आयोजित विशेष कार्यक्रममा पोखरेलको १००औँ लाइभ प्रस्तुतिसँगै पुस्तक सार्वजनिक गरिएको हो । सो समारोहमा लेखक तथा संगीतकर्मी हिरण्य भोजपुरे, अमेरिकास्थित नेपाली सद्भावना दूत विनोद अधिकारी, ग्लोबल नेपाल फिल्म अवार्ड अमेरिकाका अध्यक्ष नवराज श्रेष्ठ, चर्चित संगीतकार मनोजराज सिवाकोटी र आयोजक सुमन केसी लगायत विशिष्ट व्यक्तिहरूको उपस्थिति रहेको थियो ।
पुस्तक ‘साईग्रेस: द स्टोरीटेलर’ले पोखरेलको कथा वाचन यात्राको समग्र चित्र कोरेको छ-विश्वभरका प्रस्तुति, प्रभाव पार्ने क्षणहरू र अन्तरक्रियाबाट सृजिएका मर्मस्पर्शी अनुभवहरूलाई पुस्तकमा आत्मीयताका साथ समेटिएको छ । उक्त पुस्तकको एक मुख्य आकर्षण उनका चर्चित अडियो उपन्यासमध्ये एक ‘मेरो अधुरो प्रेम’ हो, जुन युट्युबमा ६६ लाखभन्दा बढी पटक हेरिएको छ ।
साईग्रेसले पुस्तकमा आफ्ना निजी अनुभूति, जीवनप्रतिको दृष्टिकोण र श्रोतासँगको सम्बन्धलाई भावुक तरिकाले प्रस्तुत गरेका छन् । एक श्रोताले कथा सुनेर आत्महत्याको विचार परित्याग गरेको घटना पुस्तकको सबैभन्दा प्रभावशाली प्रसंगमध्ये पर्छ । यो पुस्तक साईग्रेसको व्यक्तिगत यात्रा मात्र होइन, कथा वाचनको रूपान्तरणकारी शक्ति र मानव जीवनमा ल्याउन सक्ने सकारात्मक परिवर्तनको गहिरो मूल्याङ्कन पनि हो । उनका शब्दहरू जीवन छुन जान्ने, बदल्न सक्ने र आत्माको गहिराइमा पुग्ने क्षमता राख्छन् भन्ने तथ्य यस प्रकाशनमार्फत पुनः पुष्टि भएको छ ।
@parikalanewsofficial
Discussion about this post