पल शाह बाहिरिएपछि अब ‘महाराजधिराज’को रिलिज सर्ने ? यसो भन्छन् निर्माता

इटहरी/ चर्चित अभिनेता पल शाहले प्रतिक्षित फिल्म ‘महाराजधिराज’बाट हात झिकेपछि सो फिल्मको प्रदर्शन मितिलाई लिएर अनिश्चितता बढेको छ । निर्माण टिमले शाहसँगको सम्झौता अन्त्य भएको आधिकारिक रूपमा घोषणा गरेसँगै यस विषयले फिल्म वृत्तमा तरङ्ग पैदा गरेको छ । फिल्मका निर्माता विराज विष्टले सामाजिक सञ्जाल फेसबुकमार्फत एक स्ट्याटस लेख्दै पल शाहसँगको सहकार्य समय अभावका कारण टुङ्गिएको स्पष्ट पारेका छन् ।

उनले “प्रिय दर्शक बृन्द तथा विशेष त: पल शाह ज्युका फ्यानहरू मा नमस्कार !!! हामीलाई थाहा छ, ‘महाराजधिराज’ फिल्ममा पल शाहसँगको हाम्रो सम्झौता भङ्ग भएको खबरले तपाईँहरूलाई पक्कै पनि नरमाइलो लागेको छ,” स्ट्याटसमा भनेका छन्, “हामी तपाईँहरूलाई यति जानकारी गराउन चाहन्छौँ कि यो सम्झौताको अन्त्य केवल समयको कमीले भएको हो । यसमा कुनै पनि मनमुटाव वा नराम्रो भावना छैन ।”
निर्माता विष्टले पल शाहको व्यावसायिकता र कलाको सम्मान गर्ने बताउँदै उनको उज्ज्वल भविष्यको कामना गरेका छन् ।

यता अभिनेता पल शाहले भने आफ्नै ब्यानरमा निर्माण हुन लागेको फिल्म ‘यानिमाया’लाई समय दिनुपर्ने भएकाले ‘महाराजधिराज’बाट बाहिरिएको बताएका छन् । यो फिल्म महाराजधिराजको हालसम्म छायांकन समेत सुरु भइसकेको छैन । ‘यानीमाया’ र ‘महाराजधिराज’को छायांकन सेड्युल जुधेको कारण महाराजधिराज छोड्नुपरेको अभिनेता शाहको भनाइ छ । निर्माता विष्टले परीकला न्युजसँगको कुराकानीमा अब फिल्मको तोकिएको मिति, अर्थात् दशैँको फूलपातीबाट सर्न सक्ने सम्भावना औँल्याएका छन् । उनले भने, “अब अर्को कलाकारलाई स्क्रिप्ट दिनुपर्ने र फाइनल गर्नुपर्दा समय लम्बिने हुँदा रिलिज सर्न सक्नेछ । यदि चाँडै नै अर्को कलाकार अनुबन्ध भएमा हामी सोही मितिमा ‘महाराजधिराज’लाई रिलिज गर्ने गर्नेछौँ।”

@parikalanewsofficial

‘महाराजधिराज’मा पल शाहको ठाउँमा कुन कलाकारको प्रवेश हुने छ भन्ने विषयमा निर्माण टिमले हालसम्म कुनै घोषणा गरेको छैन । फिल्मवृत्तमा भने यो चासोको विषय बनेको छ । यद्यपि, फिल्ममा अन्य चर्चित कलाकारहरूको भने बाक्लो उपस्थिति रहेको छ । आर्यन सिग्देल, रमेश उप्रेती, पुष्प खड्का, वर्षा राउत, वर्षा शिवाकोटी, उषा रजक, जय किशन बस्नेत, गजित विष्ट र आशा पौडेल जस्ता कलाकारहरू यस फिल्ममा अनुबन्धित भइसकेका छन् । परिच्छेद सेनको लेखन तथा निर्देशनमा बन्न लागेको ‘महाराजधिराज’लाई एक भव्य र फरक स्वादको फिल्मको रूपमा प्रचार गरिएको छ ।