पल शाहले किन छाडे ‘महाराजधिराज’ ? निर्माण टिमसँगको सम्झौता अन्त्य

इटहरी/ आफ्नै निर्माण कम्पनीमार्फत फिल्म ‘यानीमाया’ बनाउने तयारीमा रहेका अभिनेता पल शाह प्रतिक्षित फिल्म ‘महाराजधिराज’बाट बाहिरिएका छन् । निर्माण कम्पनी छत्रेश्वर म्यानेजमेन्ट प्रा.लिले बिहीबार एक सूचना सार्वजनिक गर्दै शाहसँग गरिएको सम्झौता औपचारिक रूपमा अन्त्य गरिएको जनाएको हो । गत कात्तिक १४ गते दुबै पक्षबीच भएको सहमति अब अन्त्य भएको घोषणा गर्दै कम्पनीले आगामी दिनमा यस विषयमा कुनै पनि प्रकारको प्रतिक्रिया नदिने बताएको छ ।

पल शाह स्वयंले भने सामाजिक सञ्जालमार्फत स्पष्ट पारेका छन् कि एकै समयमा दुई फिल्मको छायांकन पर्न गएकाले ‘महाराजधिराज’बाट अलगिन बाध्य भए । उनले निर्माण र अभिनय दुबै जिम्मेवारी सम्हाल्नुपर्ने आफ्नै फिल्म ‘यानीमाया’लाई प्राथमिकता दिनुपर्ने भएको बताएका छन् । शाहले ‘महाराजधिराज’मा काम गर्ने इच्छा हुँदाहुँदै पनि समय अभावले सम्भव नभएको प्रष्ट पारेका छन् ।

@parikalanewsofficial

निर्देशक तथा लेखक परिच्छेद सेनको निर्देशनमा बन्न लागेको ‘महाराजधिराज’का लागि पल शाह सबैभन्दा पहिला अनुबन्धित कलाकार थिए । उनकै २ क्यारेक्टर लुक्स सहितको पोष्टर समेत सार्वजनीक भएको थियो । अब उनी बाहिरिएपछि आर्यन सिक्देल, रमेश उप्रेती, पुष्प खड्का, वर्षा राउत, वर्षा शिवाकोटी, गजित विष्ट, उषा रजक लगायतका कलाकारहरू फिल्ममा आवद्ध छन् ।

अब फिल्ममा पल शाहको ठाउँमा को रहनेछन् भन्ने निर्माण युनिटले खुलाएको छैन । फिल्मका प्रस्तुतकर्ता बिराज विष्ट हुन् भने निर्माता टोपेन्द्र विष्ट, चक्रबहादुर केसी र रबी खड्का रहेका छन् । शाह बाहिरिए पनि फिल्मको छायाङ्कनको तयारी तीव्र पारिएको छ । निर्माण टिमले बाँकी कलाकारहरूसँग अघि बढ्दै फिल्मलाई निर्धारित समयमा फ्लोरमा लैजाने तयारी गरिरहेको छ ।