इटहरी/ यही वैशाख १८ गतेबाट प्रदर्शनको अन्तिम तयारीमा रहेको र सेन्सर बोर्डबाट समेत पास भइसकेको नेपाली फिल्म ‘लालीबजार’को प्रदर्शन अदालतले रोकेपछि यस विषयमा बादी समुदायकी प्रतिनिधि अस्मिता बादीले आफ्नो धारणा सार्वजनिक गरेकी छन् । उनले कला र सृजनामाथि अदालतबाट रोक लगाउनु भन्दा संवादबाटै समाधान खोजेर फिल्मलाई प्रदर्शनको अवसर दिनुपर्ने बताएकी छन् ।
सामाजिक सञ्जालमा एक स्ट्याटस लेख्दै उनले सुरुदेखि नै यो फिल्मले बादी समुदायलाई कसरी प्रस्तुत गरेको छ भन्ने विषयमा आफ्नो गहिरो चासो रहेको खुलाएकी छन् । निर्माण पक्षसँग आफ्ना गुनासा र आपत्ति राखेपछि आफूले फिल्म हेर्ने अवसर पाएको बताउँदै उनले समग्रमा फिल्म राम्रो बनेको प्रतिक्रिया दिएकी छन् । “एक बादी समुदायको प्रतिनिधि पात्रको रूपमा मैले यसलाई हेर्दा मेरो लागि सधैं केन्द्रमा आउने प्रश्न यही रह्यो कि कथा कसको हो ? कसले भनिरहेको छ ? र कसको आँखाबाट भनिएको छ ?” उनले लेखेकी छन् ।
@parikalanewsofficial
फिल्म समग्रमा राम्रो लागे पनि केही संवाद र दृश्यहरूमा आफ्नो गम्भीर आपत्ति रहेको उनले स्पष्ट पारेकी छन् । यद्यपि, ती आपत्तिजनक विषयहरूलाई सच्याउन निर्माण पक्षबाट प्रतिबद्धता पाइसकेको जानकारी दिँदै उनले भनिन्, “यदि ती आपत्तिजनक पक्षहरू सच्याइन्छन् भने, फिल्मलाई प्रदर्शनमा आउन दिनुपर्छ ।” साहित्य र कलाप्रति रुचि राख्ने अस्मिताले कला र साहित्य समाजको ऐना मात्र नभई समाजलाई झक्झक्याउने माध्यम पनि भएको बताएकी छन् ।
उनले असहमति र आपत्तिहरू हुन सक्ने भए पनि सृजनालाई सकेसम्म अदालतको ढोकासम्म पुर्याउन नहुनेमा जोड दिएकी छन् । “असहमति हुन सक्छ, आपत्ति हुन सक्छ तर फिल्मलाई फिल्मकै रूपमा हेरेर त्यसले भनेको कथा र दृष्टिकोण बुझ्नु पनि उत्तिकै जरुरी हुन्छ,” अभिव्यक्ति स्वतन्त्रताको पक्षमा वकालत गर्दै उनले उल्लेख गरेकी छन्, “अदालतबाट सृजनामाथि रोक लगाउनु भन्दा, त्यसको संवेदनशीलतालाई बुझी संवादबाटै सुधारको बाटो खोज्नु आवश्यक हुन्छ ।”
Discussion about this post