‘एक मुठ्ठी बादल’मार्फत उदाउँदै अविरल: ५ वर्षको पर्खाइदेखि पहिलो हवाई यात्रासम्मको रोमाञ्चक कथा

इटहरी/ नेपाली फिल्म क्षेत्रमा एउटा नयाँ अनुहारको प्रवेश हुँदैछ, अविरल प्रताप अधिकारी । यही आउँदो जेठ १ गतेबाट प्रदर्शनमा आउन लागेको फिल्म ‘एक मुठ्ठी बादल’ मार्फत उनले ठुलो पर्दामा डेब्यु गर्दैछन् । रोचक कुरा त के छ भने, उनी यस फिल्मका कलाकार मात्र नभएर सम्पूर्ण सुटिङ युनिटकै सबैभन्दा कान्छा सदस्य हुन् । विश्वका विभिन्न ल्याबहरुको यात्रा तय गर्दै करिब ६-७ वर्ष लगाएर ‘एक मुठ्ठी बादल’ को पटकथा तयार भएको हो ।

यसै क्रममा फिल्मको भाइ चरित्रका लागि सबैभन्दा पहिलो अडिसन दिने व्यक्ति अविरल नै थिए । जम्मा १७ वर्षको उमेरमा, अभिनयको कुनै ज्ञान र अनुभव बिना नै उनले दुई पेजको सिन आफ्नो विवेकले अभिनय गरेर पठाएका थिए । निर्देशक सहारा शर्माले ‘पछि खबर गर्छौं’ भनेको ठीक ५ वर्षपछि बल्ल उनलाई दोस्रो अडिसनको लागि बोलावट भयो । दोस्रो अडिसन पार गरेपछि मात्र उनले यो भूमिका पक्का गरेका थिए ।

अडिसनबाट छानिएको त्यो दिन अविरलको जीवनकै अविस्मरणीय क्षण बन्यो । यसले उनको अभिनय गर्ने सपना मात्र पूरा गरेन, जीवनमै पहिलो पटक हवाइजहाज चढ्ने अवसर पनि जुरायो । सुटिङका लागि पोखरा जाँदा उनले पहिलो पटक प्लेनको रोमाञ्चक अनुभव सँगाले । सुटिङ सेटको आत्मीयताले उनलाई यति छोएको थियो कि, सुटिङ सकिएको अन्तिम दिन उनी भावुक भएर रोएका थिए ।

अविरलले कला र सिर्जनाको गुण आफ्नै पारिवारिक बिरासतबाट पाएका हुन् । उनका हजुरबुवा चर्चित कवि तथा गीतकार क्षेत्रप्रताप अधिकारी हुन् भने बुबा अमानप्रताप अधिकारी कार्यक्रम निर्देशक एवं कमेन्टेटर हुन् । यही पारिवारिक पृष्ठभूमिलाई पछ्याउँदै उनले नाटकबाट आफ्नो अभिनय यात्रा सुरु गरेका थिए । ‘एक मुठ्ठी बादल’ पछि उनले ‘पारी बुटोल’ नामक अर्को फिल्ममा पनि महत्वपूर्ण भूमिका निर्वाह गरिसकेका छन् ।

@parikalanewsofficial

फिल्ममा अविरलले घरको एक्लो छोरो र दिदीहरु उषा रजक र आँचल शर्माको पुलपुलिएको भाइको भूमिका निर्वाह गरेका छन् । तर, वास्तविक जीवनमा उनी त्यति धेरै पुलपुलिएका छैनन् ।
घरमा आफ्नै दिदीसँग हुर्किएका कारण उनलाई फिल्मभित्रको दिदी-भाइको सम्बन्ध बुझ्न भने निकै सहज भयो । यद्यपि, पर्दामा बोल्ने शैली र वास्तविक जीवनको शैली नितान्त फरक रहेको उनी बताउँछन् ।

अविरलका अनुसार यो फिल्म नेपालभरिका सम्पूर्ण परिवारमाथि गहन अनुसन्धान गरेर लेखिएको जस्तो लाग्छ । “फिल्मभित्रका हरेक सदस्यले हाम्रो समाज र परिवारका भिन्न-भिन्न सदस्यको प्रतिनिधित्व गरेका छन् । हरेक चरित्र हेर्दा दर्शकलाई आफ्नै भोगाइ जस्तो महसुस हुन्छ । यसमा भाइको चरित्र अझ विशेष छ ।” उनी भन्छन् । यो फिल्ममा निशा शर्मा, शेखर चापागाईं, आँचल शर्मा, उषा रजक, मनिष निरौला, गौरव बिष्ट, अविरल प्रताप अधिकारी, भिमा मैनाली, र अस्मिता गौतमको प्रमुख भूमिकामा अभिनय रहेको छ ।