नेगेटिभ अवतारमा मेक्सम, मालती र मंगलेको प्रेममा कसरी आयो उतारचढाव ?

इटहरी/ ‘नाक फुटेको मात्र देखिस्, नाक काटेको देखिनस्’- समाजमा ‘इज्जत’को नाममा हुने बाध्यता र यथार्थलाई झल्काउने यस्तै मार्मिक संवादसहित प्रतीक्षित नेपाली फिल्म ‘मालती मंगले’को ट्रेलर सार्वजनिक भएको छ । यही वैशाख २५ गतेबाट देशभरका हलहरुमा प्रदर्शनमा आउन लागेको यस फिल्मले ट्रेलरमार्फत पूर्ण पारिवारिक र सामाजिक कथाको उत्कृष्ट झलक दर्शकमाझ पस्किएको छ ।

ललितपुरको लबिम मलस्थित क्युएफएक्स सिनेमाजमा आयोजित एक विशेष समारोहबीच निर्माण पक्षले फिल्मको ट्रेलर रिलिज गरेको हो । सार्वजनिक ट्रेलरमा मुख्य पात्र मालती अर्थात् अभिनेत्री वर्षा राउत र मंगले अर्थात् अभिनेता विजय बराल बीचको प्रेम, उनीहरूको सम्बन्धमा आउने उतारचढाव र पारिवारिक खटपटलाई केन्द्रमा राखिएको छ ।

छोरा र छोरीबीच समाजले गर्ने विभेदकारी मानसिकतालाई फिल्मले प्रमुख विषय बनाएको छ । अभिनेता मेक्सम गौडेललाई ‘हरि’ नामक नेगेटिभ चरित्रमा प्रस्तुत गरिएको छ, जसले साथीभाइबीचको सुमधुर सम्बन्ध र त्यसमा आउने दरारलाई पर्दामा देखाउनेछन् । ट्रेलरमा यसअघि नै चर्चामा रहेका ‘झ्याम पारम’ र ‘सुनैको सपनी’ गीतका आकर्षक दृश्यहरू पनि समावेश गरिएका छन् । हेर्नुस् ट्रेलर ।

यो गीतहरू ‘सुनैको सपनी’, ‘ढुङ्गा माथि लेऊ’ र ‘झ्याम पारम’ गीत तथा फिल्मको टिजर यसअघि नै दर्शकले रुचाई सकेका छन् । ट्रेलर सार्वजनिक कार्यक्रममा मुख्य कलाकारहरू विजय बराल, वर्षा राउत र मेक्सम गौडेलका साथै फिल्मका निर्माता तथा वरिष्ठ गायक रामकृष्ण ढकाल, निर्देशक प्रकु पाण्डेय, कार्यकारी निर्माता सागर ज्ञवालीलगायतको बाक्लो उपस्थिति रहेको थियो ।

रानी फिल्म्स र युनि इन्टरटेन्मेन्टको सहकार्यमा निर्माण भएको यस फिल्ममा विजय, वर्षा र मेक्समका अलावा प्रकाश घिमिरे, सरिता गिरी, नरिन थापा, मान्सु सापकोटा, सुस्मा निरौला, सुनिल तामाङलगायतका कलाकारको दमदार अभिनय हेर्न पाइनेछ । फिल्मको कथा निर्देशक प्रकु पाण्डेय आफैँले लेखेका हुन् भने पटकथा तथा संवाद संयोग गुरागाईँले तयार पारेका हुन् ।

@parikalanewsofficial

कार्यकारी निर्माता सागर ज्ञवाली रहेको यस फिल्ममा बाबु सुवेदी, रबिन श्रेष्ठ, वेदना कर्माचार्य, पद्मावती गुरुङ, स्वीकृति बस्नेत र मिलन बजगाईँले सह-निर्माताको भूमिका निर्वाह गरेका छन् । फिल्मलाई प्राविधिक रूपमा पनि अब्बल बनाइएको छ । यसको छायाङ्कनमा महेश पौडेल, सम्पादन रोमी मोजेज, रङ्ग संयोजन कृष्ण भण्डारी, पार्श्व सङ्गीत सुजिल कर्माचार्य र ध्वनि मिश्रण डिकेश खड्गीको रहेका छन् । फिल्मलाई आरआर फिल्म्सले वितरण गर्दैछ ।