बादी समुदायको कथामा ‘लालीबजार’, यसका लागि स्वस्तिमाले १० वर्षपछि दिइन् अडिसन

इटहरी/ नेपाली समाजको एउटा संवेदनशील साथै ओझेलमा परेको पाटो हो, बादी समुदाय । अब यही समुदायभित्रको गहिरो वेदना र आमा–छोरीको मार्मिक कथालाई नेपाली फिल्म क्षेत्रमामा उतार्दैछ, सफल फिल्म निर्माण कम्पनी ‘षट्कोण आर्ट्स’ । ‘टल्क जंग भर्सेस टुल्के’, ‘जात्रा’, र ‘महापुरुष’ जस्ता सफल एवं व्यावसायिक फिल्महरू दिएर दर्शकको विश्वास जितेको यस ब्यानरले यही वैशाख १८ गतेबाट आफ्नो नयाँ फिल्म ‘लालीबजार’ प्रदर्शनमा ल्याउँदैछ ।

शनिबार काठमाडौँमा आयोजित पत्रकार सम्मेलनमा निर्माण पक्षले यो फिल्म बादी समुदायले समेत गर्व गर्न सक्ने स्तरमा अनुसन्धान गरेर बनाइएको दाबी गरेको छ । षट्कोण आर्ट्सले निर्माण गरेका यसअघिका सबै फिल्मको कमान्ड निर्देशक प्रदीप भट्टराईले सम्हाल्दै आएका थिए । तर, ‘लालीबजार’ मा भने निर्देशनको रुपमा यम थापा रहेका छन् । कार्यकारी निर्माता तथा पटकथाकार प्रदीप भट्टराईका अनुसार, तराईको विषयमा फिल्म बनाउने सोचका साथ सुझाव लिन जाँदा निर्देशक यम थापाले आफूसँग भएको बादी समुदायको कथा सुनाएका थिए ।

कथा यति शक्तिशाली थियो कि निर्माण टिमले तत्कालै यसमा फिल्म बनाउने निर्णय लियो । कथाको मर्म र बर्दियाको परिवेशलाई यम थापाले नै न्याय गर्न सक्ने विश्वासका साथ उनलाई नै निर्देशनको जिम्मा दिइएको हो । नेपाली फिल्म क्षेत्रमा एक दशक बिताइसकेकी र ‘बुलबुल’ तथा ‘चिसो मान्छे’ जस्ता फिल्मबाट आफूलाई अब्बल अभिनेत्रीको रुपमा प्रमाणित गरिसकेकी अभिनेत्री स्वस्तिमा खड्का ‘लालीबजार’ लाई आफ्नो करिअरकै ‘टर्निङ प्वाइन्ट’ मान्छिन् ।

यो फिल्ममा काम गर्न उनी यति लालायित थिइन् कि, अभिनय यात्राको १० वर्षपछि उनले ‘लुक टेस्ट’ का लागि अडिसन नै दिइन् । फिल्ममा बादी महिला ‘मधुवाला’ को भूमिका निर्वाह गरेकी स्वस्तिमाले पात्रको गहिराइ बुझ्न आफैँ बर्दिया पुगेर त्यहाँका पाका उमेरका आमाहरूसँग भेटघाट र अनुसन्धान गरेकी थिइन् । “मैले देखेको र बुझेको भन्दा भिन्नै संसारमा एउटा पात्र भएर बाँच्न पाएँ,” उनले भनिन् ।

@parikalanewsofficial

सधैँ सामाजिक विषयवस्तुलाई उठान गर्दै आएको षट्कोण आर्ट्सले यसपटक विषयवस्तुको उठानमा झनै गम्भीरता अपनाएको निर्माता म्याक्स दीपेश खत्री बताउँछन् । यस फिल्ममा अभिनेता रवीन्द्रसिंह बानियाँले ‘टल्क जंग भर्सेस टुल्के’ पछि कडा नकारात्मक भूमिका निर्वाह गरेका छन् । चरित्र निर्माणको अनुभव सुनाउँदै उनले भने, “मलाई त्यो पात्र निर्वाह गर्दा नै गाह्रो भयो भने त्यहाँका दिदीबहिनीहरूले कसरी सहेर बस्नुभएको होला ? समाजमा यस्ता पात्रहरू धर्तीमा रहन लायक छैनन्। यो फिल्ममा काम गर्दा थाहा पाएँ, हामीले वा राज्यले ती समुदायसँग जतिपटक माफी मागे पनि कम हुन्छ ।”

यस फिल्मबाट दुई नयाँ अनुहार विशाल देवकोटा र प्रशंसा सुवेदीले नेपाली फिल्म क्षेत्रमा डेब्यु गर्दैछन् । रंगमञ्चको पृष्ठभूमिबाट आएका विशाल देवकोटाले फिल्ममा स्वस्तिमा खड्काको जोडीका रूपमा काम गरेका छन् । षट्कोण आर्ट्सको टिमसँग काम गर्न पाउनुलाई उनले ठूलो अवसर मानेका छन् । यस्तै ‘जेनजी’ अभियन्ता र कन्टेन्ट क्रिएटरका रूपमा परिचित प्रशंसा सुवेदीले ग्रामीण भेगको चरित्र र लवजमा आफूलाई ढाल्न वर्कसपमा कडा मिहिनेत गरेकी छिन् । फिल्म रिलिज हुन अझै केही समय बाँकी रहे पनि यसका सामग्रीले दर्शकको ध्यान खिचिसकेका छन् ।

गर्भवती महिला शृंगार गरेर ढोकामा उभिएको पोस्टरले कथाको भाव स्पष्ट पारेको छ । त्यस्तै, फिल्मका गीतहरू ‘मायालाई के दिउँ म बैना’, ‘मिठो संसार’, र ‘मै राम्री छु त नी’ अहिले युट्युब, टिकटक लगायतका डिजिटल प्लेटफर्ममा लोकप्रिय भइरहेका छन् । फिल्ममा अभय बराल, गोविन्द सुनार, आशा पौडेल, समाइरा थापा लगायतका कलाकारको पनि अभिनय रहेको छ । डिजिटल माध्यममा भर नपरी बर्दियामै पुगेर गरिएको स्थलगत अनुसन्धान र बलियो कथावस्तुले ‘लालीबजार’ लाई यो वर्षको सर्वाधिक प्रतीक्षित फिल्म बनाएको छ ।