दशैंको ‘भिडन्त’ छल्दै ‘झिँगेदाउ २’ असोज ३ मा रिलिज हुने

इटहरी/ नेपाली फिल्म क्षेत्रमा दशैंको अवसर पारेर फिल्म रिलिज गर्ने होडबाजी नौलो होइन । यसपटक यही होडबाजी र सम्भावित ‘बक्स अफिस क्ल्यास’लाई बुद्धिमानीपूर्वक छल्दै बहुप्रतिक्षित फिल्म ‘झिँगेदाउ २’ ले आफ्नो प्रदर्शन मिति हेरफेर गरेको छ । सुरुवातमा दशैंको फूलपातीलाई लक्षित गरिएको यो फिल्म अब भने आगामी असोज ३ गते अर्थात संविधान दिवसको अवसर पारेर देशव्यापी प्रदर्शनमा आउने भएको छ ।

मङ्गलबार निर्माण पक्षले फिल्मको फस्टलुक पोस्टर सार्वजनिक गर्दै नयाँ र सुरक्षित रिलिज मितिको औपचारिक घोषणा गरेको हो । पोस्टरमा चलचित्रका चार मुख्य अनुहारलाई विशेष ‘क्यारेक्टर लुक्स’मा प्रस्तुत गरिएको छ । पोस्टरमा अभिनेत्रीद्वय केकी अधिकारी र आँचल शर्माका साथमा अभिनेताद्वय महेश त्रिपाठी र कुशल विष्ट अटाएका छन् । निर्देशक ज्ञानेन्द्र देउजाका अनुसार दशैंमा धेरै फिल्मको भीडभाड हुने देखिएपछि दर्शकले ढुक्कले फिल्म हेर्न पाऊन् भनेर असोज ३ को मिति रोजिएको हो ।

यो पोस्टरले दर्शकमाझ फिल्मको कथावस्तुलाई लिएर थप कौतूहल जगाउने निर्माण टोलीको विश्वास छ । कपनगढी सिनेमा प्रा.लि. र फिल्म क्रिउ नेपालको संयुक्त ब्यानरमा निर्माण भएको यस फिल्मको ‘स्टारकास्ट’ निकै बलियो छ । पोस्टरमा फिचर भएका चार कलाकार बाहेक फिल्ममा सरोज खनाल, आर्यन सिग्देल, बसुन्धरा भुषाल, चैत्यदेवी सिंह, हिउँवाला गौतम जस्ता अनुभवी कलाकारहरूको अभिनय रहेको छ ।

@parikalanewsofficial

त्यसैगरी विजय देउजा, आशा भुषाल, अभय राज बराल, आशिष पुरुष लगायतले पनी यो फिल्ममा अभिनय गरेका छन् । फिल्ममा सुलभ प्रतीक देउजा र समीक्षा देउजाको लगानी रहेको छ । अहिले धमाधम डबिङको चरणमा रहेको यस फिल्मको कथा निर्देशक ज्ञानेन्द्र देउजा स्वयंको हो भने पटकथा परिच्छेद सेन, गोविन्द फुयाल र शिशिर चालिसेले तयार गरेका हुन् ।

यस्तै छायाङ्कन विष्णु घिमिरे ‘कल्पित’, सम्पादन मित्र डि गुरु, सङ्गीत अर्जुन पोखरेलले गरेको फिल्ममा रोशन श्रेष्ठको द्वन्द र रामजी लामिछानेको नृत्य रहेको छ । दर्शकलाई नेपालका विभिन्न रमणीय स्थानहरूको दृश्य पस्कन निर्माण टोलीले देशका ११ भन्दा बढी लोकेसनमा छायांकन गरेको छ । काभ्रे, काठमाडौं, भक्तपुर, साँखुदेखि लिएर तनहुँको बन्दीपुर र देवघाट, दोलखा, मकवानपुरको चित्लाङ र पालुङ हुँदै चितवनसम्म पुगेर फिल्मको छायाङ्कन गरिएको हो ।