इटहरी/ पछिल्ला केही वर्षमा नेपाली फिल्मप्रेमीहरू गहिरा भावना बोकेका, आत्मीयता मिसिएका कथाहरू प्रति झन् बढी आकर्षित भएका छन्। कुनै बेला हास्य प्रधान फिल्महरूले हल भरिराख्थे, अहिले भने दर्शकले आफ्नै जीवनसँग मेल खाने, पीडा, माया र संघर्ष मिसिएका कथाहरू रोज्न थालेका छन्। ‘पूर्ण बहादुरको सारंगी’, ‘बोक्सीको घर’, ‘ऊनको स्वीटर’ जस्ता फिल्मले यही रुचिको प्रमाण दिएका छन्। यही क्रमलाई बलियो बनाउने तयारीमा छन् निर्देशक हिमाल न्यौपाने फिल्म ‘जनै हराएको मान्छे : सम्बन्धका धागाहरू’ लिएर।
निर्देशक न्यौपाने भन्छन्, “यो फिल्म आम नेपालीको जीवनसँग जोडिएको छ। निम्न र मध्यम वर्गीय परिवारको भोगाइ, आमाबुबाप्रतिको जिम्मेवारी, मनको तडप सबै समेटिएको छ हाम्रो कथामा।” भर्खरै सार्वजनिक भएको गीतले पनि एउटै छोराले आमालाई खुसी पार्न गरेको संघर्षलाई मार्मिक ढंगले प्रस्तुत गरेको छ।
फिल्मले समेट्नेछ यथार्थ त्यही यथार्थ जुन रुमानी कल्पनाभन्दा धेरै नजिक लाग्छ, त्यही संघर्ष जसलाई धेरै नेपालीले नदेखेझैँ देखिरहेका छन्। आर्थिक रूपमा कमजोर भए पनि आत्मिक रूपमा बलियो पात्रहरूको कथा हो ‘जनै हराएको मान्छे’।भदौ ६ गते प्रदर्शनमा आउने तयारीमा रहेको यो फिल्मले नाटकीय होइन, जीवनमै गढेको अनुभव सुनाउनेछ। फिल्ममा विजय बराल प्रमुख भूमिकामा छन् जसलाई निर्माण पक्षले ‘एपिक नेचुरल स्टार’ को उपमा दिएको छ। ‘पूर्ण बहादुरको सारंगी’ पछि यो वर्ष विजयको पहिलो मुख्य भूमिका हो।
उनीसँगै केकी अधिकारी, मिरुना मगर, गौरव पहाडी, सुशांक मैनाली, भोलाराज सापकोटा, भावना खपांगी मगर, र रियर राईजस्ता कलाकारहरूको सशक्त उपस्थिति रहेको फिल्म काठमाडौं, ललितपुर, भक्तपुर र काभ्रेका लोकेसनमा छायांकन गरिएको हो।फिल्मको कथा, पटकथा र संवाद भानुभक्त ढकालले लेखेका हुन्। फिल्ममा एसोसियट निर्देशकको रूपमा ‘प्रेमगीत ३’ का अभिनेता मनिष राउत जोडिएका छन् भने संगीतमा थानेश्वर गौतम, अर्जुन पोखरेल, एसडी योगी र प्रसान्त सिवाकोटी छन्।”जनै हराएको मान्छे : सम्बन्धका धागाहरू” केवल फिल्म मात्र होइन, आम नेपालीको भावना समेटिएको एउटा संवेदनशील अभिव्यक्ति बन्नेछ जुन मञ्चमा होइन, मनमा बज्नेछ।
@parikalanewsofficial
Discussion about this post