‘अञ्जिला’ ले पार गर्‍यो ९१ दिन, क्युएफएक्स सिनेमाले सहुलियतमा देखाउने

इटहरी/ नेपाली फिल्म ‘अञ्जिला’ ले लगातार प्रदर्शनको ९१ औँ दिन पार गर्दै सय दिनको ऐतिहासिक मोड नजिकिएको छ। फागुन २९ गतेदेखि प्रदर्शनमा आएको यो फिल्म हाल काठमाडौंको सामाखुसीस्थित सिटी स्क्वायर मलको क्युएफएक्स हलमा दर्शकहरूमाझ निरन्तर चलिरहेको छ। बिहीबारका लागि पनि तीनवटा शो तय गरिएको छ, जसले दर्शकको रुचि अझै घटेको छैन भन्ने देखाउँछ।

फिल्मका निर्माता प्रेमकुमार श्रेष्ठले सय दिन पूरा हुन लागेको अवसरमा विशेष योजना सार्वजनिक गरेका छन्। उनका अनुसार क्युएफएक्स सिनेमाजले यो फिल्म केही चुनिएका हलहरूमा मात्र रु. १०० को सहुलियत दरमा देखाउने निर्णय गरेको छ। “दर्शकको स्वस्फूर्त उपस्थिति देख्दा हामी उत्साहित छौँ। यो फिल्म सबैले सजिलै हेर्न पाउन् भन्ने उद्देश्यले हामीले यो निर्णयलाई समर्थन गरेका हौँ,” श्रेष्ठले बताए।

मिलन चाम्सको निर्देशनमा तयार भएको ‘अञ्जिला’ वर्ष २०८१ को व्यावसायिक हिसाबले शीर्ष पाँच फिल्मभित्र पर्न सफल भइसकेको छ। निर्माता अनुसार, फिल्मले हालसम्म १२ करोड रुपैयाँभन्दा बढीको व्यापार गरिसकेको छ। यो फिल्म राष्ट्रिय महिला फुटबल टिमकी कप्तान एन्जिला तुम्बापो सुब्बाको जीवनमा आधारित छ। मुख्य भूमिका एन्जिलाले आफैँ निभाएकी छन् भने दयाहाङ राई, सिर्जना सुब्बा, विजय बराल, माओत्से गुरुङ र प्रेमकुमार श्रेष्ठले सशक्त अभिनय गरेका छन्।

९० औँ दिनको अवसरमा पूर्व संस्कृति, पर्यटन तथा नागरिक उड्डयन मन्त्री सुदन किराँतीले पनि फिल्म हेरेर प्रतिक्रिया दिएका छन्। “पूर्वी पहाडको किराँती समाजको कथा हेरिरहँदा आफैँलाई पर्दामा देखिरहेँ।निर्देशक चाम्स हाल बेलायतमा रहेका छन्, जहाँ उनले विभिन्न शहरमा ‘अञ्जिला’ फिल्मको प्रदर्शनी गरिरहेका छन्।‘अञ्जिला’ अब केवल एक बायोपिक मात्र होइन, नेपाली फिल्म क्षेत्रको गर्विलो उपलब्धि र प्रेरणाको स्रोत बन्न सफल भएको छ।