फिल्म ‘परालको आगो’का लागि बाल कलाकारको खोजी सुरु

इटहरी/ गुरुप्रसाद मैनालीको चर्चित कथा ‘परालको आगो’मा आधारित रहेर निर्माण हुन लागेको नयाँ नेपाली फिल्म ‘परालको आगो’का लागि निर्माण टिमले बाल कलाकारको खोजी सुरु गरेको छ । जितु नेपाल, प्रकाश सपुत र सुहाना थापा जस्ता चर्चित कलाकारहरुको अभिनय रहने यस फिल्मका लागि ७ देखि ८ वर्ष उमेर समूहकी एक बालिकाको आवश्यकता रहेको निर्माण पक्षले जनाएको छ ।

हरिओम सिने मेकर्सको ब्यानरमा निर्माण हुन लागेको यस फिल्मलाई लिएर दर्शकमाझ अहिलेदेखि नै चासो बढ्न थालेको छ । यसअघि यो फिल्म आगामी दशैंको फूलपातीमा प्रदर्शन मिति तय गरेर पनि चर्चामा रहेको थियो । तर, अहिले सो मितिमा यो फिल्म प्रदर्शन नहुने भएको छ । निर्माता सुशील पोखरेलका अनुसार फिल्मको कथावस्तुले एक महत्वपूर्ण बाल पात्रको माग गरेकाले अभिनयमा अब्बल र प्रभावशाली क्षमता भएकी बालिकाको खोजी थालिएको हो ।

निर्माण टिमले इच्छुक अभिभावक तथा बालिकाहरुलाई अभिनय गरेको भिडियो क्लिप पठाएर अडिसन प्रक्रियामा सहभागी हुन आह्वान गरेको छ । प्राप्त भिडियोहरुको प्रारम्भिक मूल्यांकनपछि अन्तिम छनोट अडिसनमार्फत नै गरिने निर्माण पक्षले जनाएको छ । लक्ष्मण सुनारले निर्देशन गर्ने यो फिल्म मैनालीको ‘नासो’ कथा संग्रहमा संग्रहित ‘परालको आगो’ कथामा आधारित छ । यस कथामा मुख्य पात्र चामे र गौंथलीको सम्बन्धको उतारचढावलाई देखाइएको छ ।

@parikalanewsofficial

फिल्ममा गौंथलीको भूमिकामा सुहाना थापा देखिने छिन् भने जितु नेपाल र प्रकाश सपुत मध्ये ‘चामे’को चरित्रमा को देखिने हुन भन्ने खुलाईएको छैन । ४८ वर्षअघि बनेको ‘परालको आगो’ नामक फिल्मको कालजयी गीत ‘उडी जाऊँ भने म पन्छी होइन’ लाई पनि यो नयाँ फिल्ममा पुनः प्रयोग गरिने भएको छ । यसका लागि मूल संगीतकार शान्ति ठटालबाट औपचारिक रुपमा अनुमति लिइसकेको निर्माता पोखरेलले जानकारी दिए । २०८२ सालमा प्रदर्शन गर्ने लक्ष्य राखिएको ‘परालको आगो’को छायांकन छिट्टै सुरु हुने बताइएको छ । यतिबेला यो फिल्मका निर्माण टीम फिल्म छायांकनको लागि लोकेशन हन्टिङमा निस्किएको छ ।