इटहरी/ विदेश जाने युवाको आकांक्षा र त्यससँग जोडिएको यथार्थलाई पर्दामा उतार्न निर्देशक कृषा चौलागाईं आफ्नो तेस्रो निर्देशकीय फिल्म ‘जहाजैमा’ लिएर आउने भएकी छन् । मंगलबार सार्वजनिक थिम पोस्टरसँगै फिल्मको औपचारिक घोषणा गरिएको हो । यूएनए प्रोडक्सनको ब्यानरमा निर्माण हुने यो फिल्मले जापान जाने सपना बोकेका नेपाली युवाको कथा भन्ने छ । सार्वजनीक पोस्टरमा एक युवक विमानस्थलमा लगेज बोकेर अगाडि बढिरहेको देखिन्छ, जसले कथाको मूल भाव झल्काउँछ ।
पढाइ, रोजगारी वा नयाँ जीवनको खोजीमा जापान उड्न चाहने युवाको यात्रा कस्तो हुन्छ ? भन्ने यथार्थ यो फिल्ममा देख्न पाइने विश्वास गरिएको छ । केही साताअघि निर्देशक चौलागाईंलाई जापानमै फिल्म निर्देशनका लागि यूएनए प्रोडक्सनले अनुबन्ध गरेको थियो । चर्चा अनुसार उनलाई फिल्म निर्देशनको लागि ५५ लाख पारिश्रमिक र १५% सेयर दिइएको छ । यो फिल्मका निर्माता उज्ज्वल गुरागाईं हुन् भने छायांकन अनुभवी सिनेम्याटोग्राफर पुरुषोत्तम प्रधानले गर्नेछन् ।
फिल्मको छायांकन नेपाल, जापान र फिलिपिन्समा गरिनेछ भने भदौ महिनाबाट सुटिङ सुरु हुने बताइएको छ । छायांकनको ठूलो हिस्सा जापानमै एक महिनासम्म हुनेछ । हाल कलाकारको औपचारिक घोषणा भएको छैन तर केही दिनअघि कृषाले जापानी अभिनेत्री रजेल इचिमियासँगको फोटो सेयर गर्दै उनी फिल्मको मुख्य भूमिकामा देखिने संकेत गरेकी थिइन् । ‘बि माइ गेस्ट’ र ‘बि माइ बेबी’ जस्ता जापानी फिल्ममा अभिनय गरेकी रजेल ‘जहाजैमा’मार्फत नेपाली फिल्ममा डेब्यु गर्न लागेकी हुन् ।
सन् २०२६ मा रिलिजको तयारीमा रहेको फिल्म हाल प्रि–प्रोडक्सन चरणमा छ । ऐँचो पैँचो फिल्मबाट निर्देशनमा डेब्यु गरेकी कृषा ‘पिताम्बर’बाट निर्देशनमा राम्रो चर्चा कमाएकी थिइन् । अब उनले ‘जहाजैमा’पछि पिताम्बरको सिक्वेल ‘पिताम्बर २’ निर्माण गर्नलाई घोषणा गरिसकेकी छन् । फिल्म ‘जहाजैमा’ यूएनए इन्टरटेन्मेन्टको ब्यानरमा निर्माण हुन लागेको पहिलो प्रोजेक्ट हो । जापानमा वितरणको अनुभव बोकेको कम्पनीले अब निर्माणमा पाइला टेकेको छ ।
@parikalanewsofficial
Discussion about this post