‘लाज शरणम्’ ले मनायो १०१ औं दिनको खुसी, विद्यार्थीलाई सहयोग

इटहरी/ फिल्म ‘लाज शरणम्’ ले प्रदर्शनको १०१ औं दिन पूरा गरेको अवसरमा सामाजिक कार्यमा हातेमालो गरेको छ। फिल्म टिमले सिन्धुपाल्चोकको चौतारा सांगाचोकगढी नगरपालिका ५ मा रहेको श्री बालकल्याण आधारभूत विद्यालयका विद्यार्थीहरूलाई सहयोग सामग्री हस्तान्तरण गरेको हो।मदर किड्स फाउन्डेसन नेपाल को आयोजनामा ‘लाज शरणम्’ का निर्माता नवीन श्रेष्ठ ले विद्यालयका ३० जना विद्यार्थीहरूलाई स्कुल ड्रेस, ब्याग र पानी पिउने बोतल प्रदान गरे।

यस अवसरमा निर्माता श्रेष्ठले फिल्म को सफलता र सामाजिक कार्यको सहकार्यबारे खुसी व्यक्त गरे। “सफलतापूर्वक प्रदर्शन भइरहेको फिल्म ‘लाज शरणम्’ को गौरवमय १०१ औं दिनको उपलक्ष्यमा हामीले विद्यार्थीहरूलाई सहयोग गरेका छौँ,” उनले भने, “यो अवसरका निम्ति आयोजक मदर किड्स फाउन्डेसन नेपाल र एसीके केटिएम सिन्धु चौतार सिटी लाई धन्यवाद दिन चाहन्छु।” उनले आगामी दिनमा पनि यस्ता सामाजिक कार्यहरूलाई निरन्तरता दिने प्रतिबद्धता जनाए।

कुमार कट्टेल को निर्देशनमा बनेको ‘लाज शरणम्’ ले १०० दिनको सफल प्रदर्शन पूरा गरिसकेको छ। काठमाडौंका दुई मुख्य सिनेमाहलहरू न्युरोडको रञ्जना सिनेप्लेक्स र गोंगबुस्थित बिएसआर मुभिज मा यसले १०१ दिन मनाएको हो। गत वर्ष शिवरात्रिको अवसर पारेर फागुन १४ गते सार्वजनिक प्रदर्शनमा आएको यो फिल्म, गत वर्ष कात्तिक १५ गते रिलिज भएको ‘पूर्ण बहादुरको सारङ्गी’ पछि १०१ दिन मनाउने पहिलो फिल्म बनेको छ।

‘लाज शरणम्’ मा सीताराम कट्टेल, विजय बराल, अर्पण थापा, महेश त्रिपाठी, मुकुन्द श्रेष्ठ, विजय लामा, रेणुनाथ योगी, सागर लम्साल, हरि निरौला, अर्जुन घिमिरे, कमलमणि नेपाल, प्रियाना आचार्य, दयाहाङ राई र बुद्धि तामाङ लगायतका कलाकारहरूको अभिनय रहेको छ। फिल्म का निर्देशक कुमार कट्टेल ‘जिग्री ब्रो’ पनि विशेष भूमिकामा देखिएका छन्।जेपीटी क्रिएसन को ब्यानरमा निर्माण भएको यो फिल्म का निर्माता नवीन श्रेष्ठ हुन् भने राम नरेश शाहर सिर्जना खड्का सह निर्माताको रूपमा रहेका छन्। निर्माता श्रेष्ठले आफ्नो पहिलो फिल्म बाट दर्शकले दिएको माया र हौसलाले आफूलाई थप उत्साहित बनाएको बताएका छन्।

‘लाज शरणम्’ को सफलतापछि निर्माता नवीन श्रेष्ठ ले नयाँ फिल्महरूको तयारीमा जुटेका छन्। उनले आगामी फिल्म ‘पाँच पाण्डव’ निर्माण गर्ने तयारी गरेको बताए। सुशील पौडेल ले पटकथा लेखिरहेको यस फिल्म लाई वसन्त निरौला ले निर्देशन गर्नेछन् र यसको छायाङ्कन आगामी भदौ आसपासमा सुरु गर्ने योजना छ। यसका साथै, निर्माता श्रेष्ठले ‘लाज शरणम् २’ पनि निर्माणको तयारी भइरहेको जानकारी दिएका छन्।’लाज शरणम्’ को यो सफलताले नेपाली **फिल्म** उद्योगमा कस्तो प्रभाव पार्ला जस्तो लाग्छ?