फिल्म ‘कल्ली’ को पोस्टर सार्वजनिक,फागुन १ बाट प्रदशनमा आउदै

इटहरी/ लेकाली इन्टरटेन्मेन्ट प्रा.लि. र कस्तुरी प्रोडक्सनको संयुक्त प्रस्तुति रहेको नेपाली फिल्म ‘कल्ली’ यही फागुन १ गते बाट देशभर प्रदर्शनमा आउने भएको छ। फिल्मको दुई पोस्टर सार्वजनिक गर्दै निर्माण पक्षले प्रदर्शन मिति औपचारिक रूपमा घोषणा गरेको हो।किरण नेपालीको प्रस्तुति र लक्ष्मण सुनारको निर्देशनमा तयार भएको यो सामाजिक विषयवस्तुमा आधारित फिल्ममा सौगात मल्ल र बेनिशा हमाल मुख्य भूमिकामा देखिनेछन्। निर्देशक सुनार अघिल्लो चर्चित फिल्म बुलाकीपछि सामाजिक यथार्थ चित्रणमा समर्पित फिल्म निर्माता एवं निर्देशकका रूपमा स्थापित छन्।

सार्वजनिक पोस्टरमध्ये एकमा सौगात मल्ललाई रौद्र मुद्रामा, हातमा रगताम्य भाला समात्दै बाघसँग आमनेसामने देखाइएको छ, जसले कथा भित्रको द्वन्द्वात्मक पाटोलाई संकेत गर्छ। अर्को पोस्टरमा सौगातसँगै बेनिशा हमाल, उत्तम प्रधान, नाजिर हुसेन, अर्पण थापा र सुलक्षण भारतीको उपस्थिति देखिन्छ, जसले कथाको चरित्र संरचना झल्काउँछ।फिल्ममा वर्षा राउत, बेगम नेपाली, विनोद न्यौपाने, रेयर राई, प्रियना आचार्य, अर्जुन गुरुङ, सन्जोक राणा, गीता अधिकारी, कुल बहादुर अधिकारी र श्याम मगर लगायतका कलाकारहरूको अभिनय रहनेछ। त्यस्तै, उपेश ढकाल, मञ्जिला बाँनिया र समर्पण खतिवडा बाल कलाकारको रूपमा देखिनेछन्।

महेश दवाडीको पटकथा, लक्ष्मण सुनारको कथा तथा निर्देशनमा बनेको फिल्मले मानव मनमा पैदा हुने लोभ र त्यसले जीवनमा निम्त्याउने असरलाई कथावस्तुको रूपमा उठाएको छ। फिल्ममा आशिष अविरल, सरित राई र केतन क्षेत्रीको संगीत, एनबी महर्जनको एक्सन निर्देशन, निसाल पौडेलको छायांकन र मिलन श्रेष्ठको सम्पादन रहेको छ। निर्माण प्रमुखको रूपमा सुरज आचार्य जिम्मेवार रहेका छन्।फिल्म ‘कल्ली’ले दर्शकहरूबीच अपेक्षा र चासो दुवै बढाइरहेको छ। सामाजिक यथार्थमा आधारित सशक्त कथावस्तुले भरिएको यस फिल्मले नेपाली सिनेमामा फरक प्रभाव पार्ने विश्वास निर्माण टोलीले व्यक्त गरेको छ।