बहुप्रतिक्षित फिल्म ‘बलिदान’मा सौगात मल्लको अहिलेसम्मकै फरक अवतार

इटहरी/ देशप्रेम, विद्रोह र बलिदानको भाव बोकेको बहुप्रतीक्षित नेपाली फिल्म ‘बलिदान’ दशैंको फूलपातीमा प्रदर्शन हुँदैछ । यो फिल्मको अहिले अभिनेता सौगात मल्लको क्यारेक्टर पोष्टर सार्वजनिक भएको छ । सार्वजनिक भएका दुई पोस्टरले फिल्म प्रेमीहरू माझ चासो बढाएको छ । सौगात मल्लले फिल्म हरुमा अहिलेसम्म गरेको मध्ये फरक लुक्स, अनौठो र प्रभावशाली अवतारले फिल्म प्रतिक्षित माथि प्रतिक्षित बनेको छ । सार्वजनीक यी पोस्टरहरूले फिल्म गम्भीर र द्वन्द्वात्मक विषयमा आधारित रहेको संकेत गर्छन् ।

पहिलो पोस्टरमा मल्ल लामो दाह्री, झ्याप्प कपाल र कालो पोशाकमा देखिन्छन् । उनको एउटा आँखा पूरै कालो भएको देखिएको छ र हातमा बलिरहेको राँको बोकेका छन् । पछाडिको दृश्यमा आगोको ज्वाला र मानिसको भिड देखिन्छ, जसले फिल्मको विद्रोहपूर्ण पृष्ठभूमि उजागर गर्छ । दोस्रो पोस्टरमा मल्ल हातमा हतियार लिएर युद्धको मैदानमा उभिएका छन् ।

निर्देशक सन्तोष सेनका अनुसार, सौगातको यो भूमिका अहिलेसम्मकै फरक र चुनौतीपूर्ण रहेको छ, जसका लागि उनले विशेष शारीरिक र मानसिक तयारी गरेका थिए । सौगात मल्ल नेपाली फिल्म क्षेत्रमा अभिनयका कारण बहुप्रशंसित अभिनेता हुन्, जसका हरेक भूमिकाले दर्शकमा गहिरो प्रभाव छोड्दै आएका छन् । ‘बलिदान’मा देखिएको उनको यो नयाँ अवतारले दर्शकलाई फिल्म हलसम्म तान्ने निश्चित देखिएको छ ।

यसअघि अभिनेता समीर भट्टको जन्मदिनको अवसरमा सार्वजनिक गरिएको प्रि-टिजरले फिल्मप्रतिको उत्साह चुल्याएको थियो । दमदार एक्सन र देशभक्तिपूर्ण संवादसहितको झलकले नेपालसहित विश्वका विभिन्न देशहरूमा युट्युब ट्रेन्डिङमा स्थान पाएको थियो । आसुसेन फिल्म्स् प्रा.लि.को ब्यानरमा बनेको फिल्ममा समीर भट्ट, सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी, प्रेम पुरी लगायतका कलाकारको अभिनय रहेको छ । यो फिल्मका निर्माता पवन ब्राडफोर्ड बिस्ट र कार्यकारी निर्माता प्रेम पुरी हुन् ।

@parikalanewsofficial