चलचित्र समीक्षक समाजको अध्यक्षमा तिमल्सेना निर्वाचित

इटहरी/ चलचित्र समीक्षकहरूको छाता संस्था चलचित्र समीक्षक समाज नेपाल (फिक्सन) ले नयाँ नेतृत्व पाएको छ। पिङ्गलास्थानस्थित नेपाल फिल्म क्याम्पसमा हालै सम्पन्न साधारणसभाले सामीप्यराज तिमल्सेना लाई सर्वसम्मत रूपमा अध्यक्षमा निर्वाचित गरेको हो। यो निर्वाचनसँगै फिक्सनले आगामी दुई वर्षका लागि नयाँ कार्यभार सुरु गरेको छ।

नवनिर्वाचित अध्यक्ष तिमल्सेनाले संस्थाका भावी योजनाहरूलाई सक्रियताका साथ अगाडि बढाउने र लामो समयदेखि रोकिएको ‘फिक्सन अवार्ड’ लाई पुन सुरु गर्ने प्रतिबद्धता जनाएका छन्।नेपाल पत्रकार महासङ्घसँग सम्बद्ध यस संस्थाको नयाँ कार्यसमितिमा विभिन्न पदमा सर्वसम्मत चयन भएका छन्। भेषराज कार्की र अनिल यादव खुला उपाध्यक्षमा चुनिएका छन् भने रीना मोक्तान समावेशी उपाध्यक्ष बनेकी छिन्। महासचिवको जिम्मेवारी प्रभाकर गौतम ले पाएका छन्। यस्तै, खुला सचिवमा नरेश फुयाँल , समावेशी सचिवमा लक्ष्मी बलायर, र कोषाध्यक्षमा समर्पण श्री चयन भएका छन्।

साधारणसभामा उपस्थित नेपाल पत्रकार महासङ्घका सचिव प्रकाश धौलाकोटी ले फिक्सनको सक्रियताको प्रशंसा गर्दै महासङ्घ सधैँ सहकार्यका लागि तयार रहेको बताए। उनले बढ्दो नेपाली फिल्म हेर्ने दर्शकमाझ निष्पक्ष समीक्षाको आवश्यकतामाथि जोड दिए।धौलाकोटीले भने, “फिल्म हेर्ने संस्कृति बढिरहेको वर्तमान समयमा निष्पक्ष समीक्षा अपरिहार्य छ।मलाई विश्वास छ कि फिक्सनका सदस्यहरूले इमानदारीपूर्वक फिल्मको मूल्यांकन गरी दर्शक तथा पाठकहरूलाई सही सूचना प्रदान गर्नुहुनेछ।”

यस अवसरमा निवर्तमान अध्यक्ष दीपेन्द्र लामा , पूर्वअध्यक्ष यज्ञशर पण्डित , पूर्वमहासचिव नारायण अमृत र निवर्तमान उपाध्यक्ष स्मृति ढुङ्गाना लगायतका महत्वपूर्ण व्यक्तित्वहरूको पनि उपस्थिति रहेको थियो।