‘रियाल रिङ्गेट’ साउन १६ गतेदेखि प्रदर्शनमा

इटहरी/ वैदेशिक रोजगारीमा रहेका नेपाली युवाहरूको पीडा, आशा र कठोर यथार्थलाई चित्रण गर्ने फिल्म ‘रियाल रिङ्गेट’ आगामी साउन १६ गते बाट देशभर प्रदर्शनमा आउने भएको छ। रेबेल फिल्म्सले हालै फिल्मको आधिकारिक पोस्टर सार्वजनिक गर्दै प्रदर्शन मिति औपचारिक रूपमा घोषणा गरेको छ।

अनुभवी म्युजिक भिडियो निर्देशक विभोर पोखरेलले यस फिल्मको निर्देशनको जिम्मेवारी सम्हालेका छन्। लामो समयदेखि संगीत तथा कला क्षेत्रमा सक्रिय गगनलाल प्रधानले फिल्म निर्माण गरेका छन्। नेपाली समाजका संवेदनशील पक्षहरूलाई कलात्मक ढंगले प्रस्तुत गर्न खप्पिस प्रदीप भारद्वाजले फिल्मको कथा तथा पटकथा लेखन गरेका हुन्।

फिल्मको नाम ‘रियाल रिङ्गेट’ आफैँमा प्रतीकात्मक छ। कतार र साउदी अरेबियाको मुद्रा ‘रियाल’ तथा मलेसियाको ‘रिङ्गेट’ को संयोजनबाट राखिएको यो नामले नै नेपाली युवाहरूको विदेश पलायनको वृत्तान्तलाई स्पष्ट संकेत गर्छ।सार्वजनिक पोस्टरले फिल्मको गम्भीर कथावस्तुलाई सशक्त रूपमा प्रतिबिम्बित गर्छ। पोस्टरको माथिल्लो भागमा एक महिला पात्रको अनुहारमा पसारिएको पीडा र भाकल देखाइएको छ, जसले स्वदेशमा पर्खिरहेका परिवारजनको अवस्थालाई चित्रण गर्छ।पोस्टरको बीच भागमा विभिन्न पृष्ठभूमिका पात्रहरूलाई समावेश गरिएको छ, जसले जीवनको संघर्ष बोकेर परदेशिएका हजारौँ नेपाली युवाहरूको प्रतिनिधित्व गर्छन्। पोस्टरमा उल्लिखित कवि नाथन रायनको मार्मिक कविता “जब त्रिभुवन विमानस्थलबाट जहाज उड्यो, जहाजसँगै सपना र जिन्दगी उड्यो” ले परदेशी यात्राको बिछोड र अपूरा सपनाहरूलाई एकै वाक्यमा समेटेको छ।

पोस्टरको पृष्ठभूमिमा देखिने खाडी देशका आधुनिक गगनचुम्बी भवनहरूले मलेसिया, कतार, यूएई लगायतका मुलुकहरूतर्फ संकेत गर्छन्। यी ती स्थानहरू हुन् जहाँ हजारौँ नेपाली युवा ‘रियाल’ वा ‘रिङ्गेट’ कमाउने आशामा पुगेका छन्, तर अक्सर तिनै सपनाभित्र शोषण, परायापन र कहिलेकाहीँ मृत्युको कठोर यथार्थ दबिएका हुन्छन्।

फिल्ममा प्रमोद चौलागाईं, निता ढुङ्गाना, छुल्ठिम डोल्मा गुरुङ, रवीन्द्र खड्का, ध्रुव कोइराला, प्रेम सुब्बा, रामचन्द्र अधिकारी, रियर राई, रोशन श्रेष्ठ, ईश्वरी बराल, बिमला गिरीलगायतका कलाकारहरूको अभिनय रहेको छ। प्राविधिक पक्षमा रोशन श्रेष्ठले द्वन्द्व निर्देशन, हरि घलेको छायाङ्कन, विपिन मल्लको सम्पादन, किरण तुलाधरको पृष्ठभूमि संगीत र राजीव समरको कोरियोग्राफी गरेका छन्।संगीततर्फ रामचन्द्र काफ्ले, किरण तुलाधर र चन्दन ध्वज केसीको संगीत रहेको छ, जसमा सुगम पोखरेल, केतन क्षेत्री, रामचन्द्र काफ्ले र जुनु रिजाल काफ्लेको स्वर सुन्न सकिन्छ। गीतका शब्दहरू अमर न्यौपाने, प्रदीप भारद्वाज र चन्दन ध्वज केसीले लेखेका हुन्।

फिल्मको छायाङ्कन भारतको राजस्थानसहित नेपालका चितवन, काठमाडौं र लेटाङ क्षेत्रमा गरिएको छ। फिल्मको वितरणको जिम्मा काफिया फिल्म्सले लिएको छ।’रियाल रिङ्गेट’ नेपाली समाजको एक महत्वपूर्ण र संवेदनशील विषयलाई पर्दामा उतार्ने सशक्त प्रयासका रूपमा हेरिएको छ। यो फिल्मले दर्शकहरूलाई कत्तिको प्रभाव पार्ला भन्ने हेर्न बाँकी छ।